Dexter Lau
KOTA KINABALU: Kim Teck Cheong Consolidated Berhad (KTC) id inggisaman miampai Unit Lansanon Koburuon Mogigiyon (UPPM) pinopoimpuun kaparagatan kaawagu dau, Ababayan Kotundunan Mongukab Puasa, i moningkanan monguhup tinimungan di momoguno nogi’ walai tanak yatim id po’ompus wulan Ramadan diti.
Maya’ Ababayan Kotundunan Mongukab Puasa, KTC om UPPM papaanjur ababayan mongukab puasa id pipiro kinoiyonon doid pototongkop sabah miampai kalansanan kopongingkuri’ koinggoritan paganakan i kotoguang kobolingkahangan ikonomi maganu sokodung id po’ompus wulan Ramadan.
Suai ko dilo’, walai tanak yatim nga’ tombuluyon, manahak diolo’ kosiwatan momili’ posokoton raya korohian diolo’ id 10 tinan Pasaragayo Servay id sosomok. Iti kopokito tonggungan imampai kotinanan korporat om Koporintaan Pogun montok manahak surupuakaraja’ kumaa mogigiyon om popoilang kounsikohan nogi’ posuni piuludan id po’ompus Ramadan.
Suai mantad dilo’, Ababayan Mongukab Puasa poonjuron UPPM diti winonsoi montok monimung tulun mantad mogisusuai nantadon, koubasanan om kotumbayaan do miilang kinoubasanan mongukab puasa otitimung.
Pinatantu’ kapanau solinaid tolu minggu id 25 kinoiyonon doid pototongkop Sabah mimpuun id Kalabakan om opupusan doid Keningau, Ababayan Iftar kopokito mogisusuai taakanon mongukab puasa ‘komunal’ (kopotonggoi toinsanan) hinombo do tangaanak noiduanan molohing om i amu’ songkuro kikosukupan kopogititimung montok mangakan takanon mongukab puasa, mitonggoi pogirot kogos piombolutan miampai mogigiyon nokoiyonon.
“Id wulan Ramadan toun diti, ounsikou kopio yahai montok popoimpuun Ababayan Kotundunan Mongukab Puasa om Momooboli posokoton raya montok tanak yatim, iso’ inggisaman di osonong montok posuni sunduan olisi, kopuahangon, om pisompuruan,” ka di Potunud Eksekutif KTC, Datuk Dexter Lau.
Potunud Karaja’ KTC, Datuk Lau Kok Sing minoboros: “Daamot dati’ mamaramit wulan Ramadan di obitua diti, kanou tokou no do toinsanan sabaagi iso’ tinimungan do mamaramai tongo’ koyuyuon di pogiilangan toinsanan om mongunsub pihunungan id nayatan koinsanai mogigiyon Sabah om mogowit kounsikohan kumaa tangaanak yatim id Sabah.”
Potunud UPPM, Datuk Awang Kadin Tang minagalap minsosongulun, pongindopuan om kotinanan do popotoluod kumaa Ababayan Kotundunan Mongukab Puasa maya’ do koponoluodan kousinan, babarang takanon toi ponguhupan ‘sukarelawan’.
“Oinsanan, kapanahak tokou waya’ osonong om papatayad do angkab om kosonongon kumaa diolo’ i momoguno,” ka disio.
