Haji Hajiji Haji Noor
KOTA KINABALU: Koporintaan Pogun pinopoobi’ soginumu’ RM3.43 riong id siriba’ projik pinotomod Kounsol Monontuduk Koonduan Sabah (MPWS) ilo’ nopo nga’ Akademik Kepimpinan Wanita (AKWan) montok timpu 2022-2024 id inggisaman popoingubas piadasan koulunan om popoburu’ kabaahan koonduan id pogun diti, ka di Boyoon Montiri, Datuk Seri Haji Hajiji Haji Noor.
Kohondot dilo’, kalansanan disio AKWan tumilombus papagaras do koonduan maya’ tongo’ kaparagatan kopomuruanan miampai modul kurusus bobos osonong.
Otumbayaan isio miampai pogisokodungan pialatan Koupisan Hal Koonduan Sabah (JHEWA) om MPWS kopongingkawas po do kopomuruanan koonduan kitonggungan id pogun diti.
“Pinoilo oku do ababayan diti, moningkanan kumaa manahak pingludaan om mongingkawas naangayan kopomuruanan koonduan id Sabah. Kohondot dilo’, ababayan diti kopiongoi di tonggungan Koporintaan Pogun i momoduli’ di kabaahon om rontob waya’ kopomuruanan koonduan id mogisuaian hal om nayatan.
“Nogi’, koporintaan nga’ poinggirot ogirot di prinsip papagaras koonduan om tumilombus mongunsub diolo’ do maganu kororohian di lobi kaparagat i potuu id sunduk sosiol, ikonomi toi ko’ pulitik pogun.
“Mantad dilo’, otumbayaan oku graduan AKWan kaanu sumaan tonggungan sabaagi songulun momuruan do timpu dumontol. Pinoilo oku do hontolon do tutumanud AKWan diti kapaampai di lansanon pulitik, tulun tomulok id nayatan siriba’ suai ko’ kogompit id komponi poinggompit koporintaan toi GLC,” ka disio kopihondot Ramai Graduasi Kurusus KOpomuruanan Koonduan do hiti, di tadau baino’. Teks boboroson disio binasa’ di Montiri KOburuon MOgigiyon om Kasasanangan Mogigiyon, Datuk James Ratib.
Boyoon Montiri minoboros, Koporintaan Pogun mamagatang inggisaman do JHEWA om MPWS id kapagarasan koonduan id pogun diti.
“Kohondot dilo’, Komontirian Koburuon Mogigiyon om Kasasanangan Mogigiyon (KPMKR) maya’ JHEWA pinopoobi’ soginumu’ RM4.2 riong montok kopoindalanan Komilaan Ibu Tunggal om Koonduan B40, Ababayan Kopomuruanan om Kaadason Koulunan nogi’ tongo’ Ababayan Kopurimanan, naamot MPWS soginumu’ RM700,000,” ka disio.
Daamot dilo’, i Hajiji minoboros, kopiongoi kinogimbanon timpu noondo, Koporintaan Pogun tumilombus minggisom montok mamagampot rikoton 30 pihatus kogompitan koonduan id mongigit karaja’ akawas om momonsoi katatapan id pogun diti.
Ka disio, ogumu’ id nayatan koonduan do noondo mongigit karaja’ akawas om tumanud kointalangan mantad JHEWA, gisom di wulan Koiso’ toun diti, tondu’ momomonsoi kootusan id Koporintaan Pogun montok karaja’ Kumoduo Monunurat Koporintaan Pogun (TSKN) nokoposurat do 33.3 pihatus ilo’ nopo nga’ songulun tondu’ mantad tolu tulun TKSN.
Ka disio, montok karaja’ Monunurat Pointatap Komontirian nopo 30 pihatus ilo’ nopo nga’ tolu tulun tondu’ mantad 10 Monunurat Pointatap Komontirian naamot 478.61 pihatus montok Luguan Koupisan ilo’ nopo 20 tulun tondu’ mantad 42 Luguan Koupisan.
Ka disio kawagu, kointalangan I naanu mantad Koupisan Ginoris Karaja’ nga’ nokopokito kinoinsawaton tondu’ sabaagi kukumaraja’ atalang kopio ilo’ nopo nga’ di toun 2020 soginumu’ 55.3 pihatus, toun 2021 soginumu’ 55.5 pihatus om toun 2023 nokoinsawat kuminaa 55.9 pihatus.
“Momoguno tokou do koonduan i kiginoris tumopong, kiharo pomusarahan wagu om sunduan di akawas montok papatantu’ Sabah koburu’ om kiharo nuludan koponorinaan di kiginoris monokitopong kopiongoi di kinoburuon pomogunon,” ka di Hajiji.
