Joniston Bangkuai
KOTA KINABALU: Laang pulis pogun montok papaharo kopoindalanan karaja’ (operasi) poinggayo monoibau modidikit aiso’ kasagaan (PATI) id koiyonon aiso’ kasagaan (setinggan) id poliliput Sabah nopo nga’ laang di kohunung kopio, ka di Luguan Kopointalangan Gabungan Rakyat Sabah (GRS), Datuk Joniston Bangkuai.
Minamarayou do pulis mantad kootusan dilo’, minoboros isio, laang dilo’ katalob do koinggayo om kadadala’ o kobolingkahangan dilo’.
Pinosotol disio, kogunaan montok mongilo om papaatod muli’ tulun songkosuayan i haro id Sabah miampai aiso’ kasagaan, nosili tingkananon Koporintaan Pogun id siriba’ pomuruanan di Boyoon Montiri, Datuk Seri Haji Hajiji Haji Noor.
“Boyoon Montiri sabaagi Ponorikohon Koumoligan Pogun toririmo popounsub kogunoon operasi di po’;ompus montok momunso modidikot aiso’ kasagaan Sabah,” ka disio id kointalangan di tadau baino’.
Tikid inggisaman mositi’ no do onuon montok papatantu’ diolo’ i nokopongingiyon nakatalib timpu, yolo’ i minanahub permit karaja’ diolo’ toi yolo’ i aiso’ nunu-nunu dokumen di nookunan oihum om kaatod muli’ kumaa pogun nantadon diolo’, naamot laang ‘punitif’ onuon kumaa mogigiyon koiyonon i mongumolig diolo’.
Miampai pinopointalang do tinimungan koumoligan om tinan pogirotkuasa’ Koporintaan Pogun om Pisompuruan maan pakarajao’ montok karaja’ agayo dilo’, ka di Joniston, tonggungan nga’ poingiliu nogi’ id tikid mogigiyon montok papatantu’ Sabah koidu’ mantad PATI.
“Lansanon mogigiyon toi mogigiyon kampung toomod kaanu papamanau tonggungan diolo’ miampai monguhup bohogian kikuasa’ mongilo pongingiyonon hinombo do haro, hinombo yolo’ poingkaraja’ do aiso’ kasagaan toi hinombo yolo’ do tumindal.”
Minoboros isio, momoguno padaahan tomporuruol Covid-19 i nopupusan di duo toun nakatalib amu’ nodii aanu gunoon montok tulun songkosuayan do amu’ maganu dokumen pamanahan nookunan om momoguno koiyonon setinggan sabaagi koiyonon umoligon.
Di kaawagu diti, Monguasa’ Pulis Sabah, Datuk Jauteh Dikun pinapabanta’ do 538 setinggan di noilaan id poliliuput pogun om ogumu’ pongingiyonon i noiyon-iyon do PATI.
Jauteh minoboros, pulis masaan mongulud palan karaja’ miampai ponguhupan mantad tinan koporintaan suai, miampai buntukon kumaa koiyonon setinggan.
Tumanud Koupisan Imigrisin Sabah, soginumu’ 8,678 tulun nakaatod minuli’ kumaa pogun nantadon di toun nakatalib.
Potunud dilo’, Datuk Sh Sitti Saleha Bahib Yusoff minoboros, di 2023, soginumu’ 1,463 operasi pinoindalan miampai 4,108 tulun tinahan.
Komoyon di Sitti koiyonon setinggan sabaagi koiyonon alasu’ (hotspot) om pinopoilo do koiyonon miagal dilo’ momoguno operasi pogiuhupan montok momunso.
