Dr. Joachim (tanga’) pinapatahak replika kunci walai Ponguhupan Mesra Rakyat (BMR) SESB kuminaa di Rose miampai tangaanak dau om sinasi’ di Jonathan (gibang), Madius (koduo, gibang) om i Mohd. Yaakob (wanan).
RANAU: Ponguhupan Mesra Rakyat (BMR) i pinatahak do Sabah Electricity Sdn. Bhd. (SESB) kouhup mogigiyon labus kakadayan masi id koyuon di lobi osimbayan om potilombus dino kopoingkawas rontob koposion diolo’.
“Tadau baino’, suminasi’ tokou kinapatahakan kunci walai kumaa di Puan Rose @ Roslinah Daimin,” ka di Kumoduo Boyoon Montiri, Datuk Seri Dr. Joachim Gunsalam i po nogi’ Montiri Koporintaan Koiyonon om Pomuwalaian ontok pinopoimagon ramai kinapatahakan kunci walai pinotoluod SESB id siriba’ Projik BMR Nayatan Watas Ranau id Kampung Langsat, do hiti, di konihab.
Ka disio, wookon ponguhupan i pinatahak nogi’ do koporintaan nopo nga’ maya’ Ababayan Pomuwalaian Mogigiyon (PPR), Ababayan Pomuwalaian Mogigiyon Mosikin Tegar (PPRT), Walai Mampu Milik om Walai Mesra Rakyat Sabah Maju Jaya (SMJ).
Dr. Joachim (kotolu, wanan) ruminamit tandamto mantad di Madius sinasi’ di Jonathan (gibang), Rose (tanga’) om i Mohd. Yaakob (wanan).
Daamot dilo’, Koporintaan Pogun toririmo tumopot om tumilombus minggisom monguhup tongo mosikin om mosikin nakadala’ lumabus mantad komosikinan.
“Otumbayaan oku do ababayan tonggungan sosial korporat (CSR) SESB diti kouhup papasanang koposion mogigiyon amu’ momuntuk tinaru,” ka disio.
Dr. Joachim minanangkabayahan kumaa di Rose om minongunsikou kumaa SESB i pinopoobi’ songinan walai i kiharo tolu pisuk toodopon, ropuhan, donimbas om pagagawasan miampai kos kinapamawaalan soginumu’ RM75,000,” ka disio.
“Koporintaan Pogun mongunsikou ababayan miagal diti.
“Ababayan ponguhupan walai miagal diti kohunung di inggisaman koporintaan montok papatantu’ kotundunan om kasasanangan mogigiyon kosuul id watas labus kakadayan ogompi’,” ka di Dr. Joachim.
Dr. Joachim suminain plak walai id siriba’ projik Ponguhupan Mesra Rakyat (BMR), SESB sinasi’ di Jonathan (gibang), Madius (koduo, gibang) om i Rose.
Lumansan nogi’ i Dr. Joachim do toun tiso’, SESB momoruhang po do mamaramit ponguhupan kotundunan diti.
Ka wagu disio, inggisaman diti kopokito kopoduliananSESB id koponguhupan koporintaan montok momonsoi kosusukupan miagal do walai iyonon kumaa mogigiyon di mosikin.
“Id hal diti, koporintaan pogun tumilombus popoindalan tongo’ ababayan kotundunan om koburuon sosio ikonomi montok mogigiyon om kirikoton pinotomod ilo’ nopo nga’ miampai mitilombus kumaa mogigiyon mosikin om bobos mosikin i nokoulud no id sistem e-Kasih,” ka di ADUN Kundasang dilo’.
Kohondot dilo’, i Dr. Joachim nga’ aiso’ nogi’ kohimpogong monokodung pomogunaan tohun watu (arang batu) tu’ iti kopongingkuri’ kos kopongimbulayan ginoris i gunoon kopio lolobi no montok mongingkawas ginumu’ kopongimbulaian ginoris montok popoburu’ pomorunan id Sabah.
Ka disio kawagu, suai ko’ tiknologi doun kaawagu, pomogunaan tohun watu nga’ oborisi’ toi kaagal di fossil fuel / disel.
“Pomogunan nokoburu’ suai nga’ kakal momoguno tohun watu montok pongimbulaian ginoris lotirik,” ka disio pinopointalang.
Nokotindapou nogi’ i Puru Parlimen Ranau, Datuk Jonathan Yassin; Ponorikohon SESB Datuk Seri Madius Tangau; Luguan Upisor Eksekutif SESB, Ir Ts. Mohd. Yaakob Hj Jaafar; tongo’ lansanon nokoiyonon om sitaf UPPM Kundasang.
