Dr. Joachim (tanga’) guminambar pongingitanan miampai dilo oinsanan i nakaampai id ababayan Walkabout PBS kopihondot Toun Wagu Sina, id Jalan Gaya om Lido di tadau Minggu’.
KOTA KINABALU: Parti Bersatu Sabah (PBS) pinapaharo ‘walkabout’ kopihondot Toun Wagu Sina 2024 id koiyonon Jalan Gaya om Lido, do hiti di konihab (ko 4tw Koduo).
Ababayan dilo’ naampai di tongo’ Kumoduo Presiden PBS ii Datuk Seri Dr. Joachim Gunsalam, Datuk Seri Dr. Yee Moh Chai om i Datuk Jahid Jahim; tongo’ Timbang Presiden, ii Datuk Johnny Mositun, Datuk Arthur Sen, Datuk Dr. Joseph Lee; Monunurat Agayo PBS, Datuk Julita Majungki; Luguan Kopointalangan, Datuk Joniston Bangkuai; Luguan Komulakan PBS, Christopher Mandut; Datuk Fredian Gan om pipiro po Puru Kounsol Akawas (AMT) suai miampai Exco Komulakan om Exco Koonduan.
Dr. Joachim (tanga’), Yiew (wanan) ruminuba’ dilo tongo’ mongingindapu’ id ababayan Walkabout PBS i pinaharo di tadau Minggu’.
Dr. Joahcim minoboros, walkabout nopo diti nga’ iso’ mantad ababayan tikid toun parti i pohoroon ontok kapamaramaian Toun Wagu Sina om lumansan do potilombuson ilo’.
“PBS tumilombus miampai do mogigiyon kaampai no id Kota Kinabalu.”
Isio nga’ minanahak nogi’ pongunsikohan kumaa di Luguan Komulakan Parti Gagasan Rakyat Sabah (Gagasan Rakyat) Bohogian Api-Api, Safwan Diego om mongongobi’ parti miagal SAPP i nobian di Lansanon Koburuon Mogigiyon (PPM) Luyang, Gee Thien Soong i minampai diolo’ id ababayan dilo’.
Dr. Joachim (wanan) pinapatahak balatak tandamato (goodies) Toun Wagu Sina kuminaa dilo songulun mantad mongingindapu’ id ababayan Walkabout PBS om poingintong io’ Dr. Yee (tohuri) om i Yiew (koduo, wanan).
Nakaampai do tinonudan dilo’, Luguan Kopointalangan Bohogian Api-Api i po nogi’ Upisor Pinotomod kumaa Boyoon Montiri, Yee Tsai Yew om sitaf PBS Bohogian Api-Api i pinopoikid nogi’ do kakambaa’ (goodies).
