Armizan Mohd. Ali (koduo, gibang) ontok pinopoimpuun SHMMP Toun Wagu Sina id Papar, konihab.
PAPAR: Skim Gatang Maksimum Timpu Karamaian (SHMMP) Toun Wagu Sina’ i kapaampai 11 ponit babarang poinggirotonkuasa’ mimpuun ko 6 gisom ko 14tw Koduo diti.
Tumanud do Utusan Malaysia, Montiri Pidagangan Suang Pogun om Kos Sara Hidup, Datuk Armizan Mohd. Ali minoboros, timpu kopoindalanan skim dilo’ nopo nga’ siam tadau.
Minoboros isio, wookon 11 ponit bababarang pinoimagon sabaagi babarang pitamangan nopo nga’ gipan opurak, sada’ bawal opurak, wogok miau, tondi’ wogok (tian), tonsi’ wogok (tonsi’ om lunok), kubis ourod nudar (Indonedia om China amu’ kaampai Beijing), ubi kantang nudar (China), bawang opurak, layou nokotuo nudar, lobak opurak nudar om lobak aragang.
Ka disio, SHMMP Toun Wagu Sina pogirotonkuasa’ maya’ Akta Kapanamangan Gatang om Antipencatutan (AKHAP) 2011 om kapasaga’ kopotontuan gatang wonsoyon kumaa nayatan papalabus, mamamajak om papadagang.
Minoboros isio, Komontirian Pomutanaman om Kojominon Takanon (KPKM) nga’ popoindalan kopiantangan po’ompus montok papatantu’ kinohoroon sitok babarang nopo nga’ korungod.
Kopogintangan gatang aanu momonsoi maya’ laman web KPDN id https://www.kpdn.gov.my.
“Tongo’ upisor pogirotkuasa’ KPDN id poliliput pomogunon popoindalan pomorisaan om kapanamangan do po’ompus id koiyonon ngaawi’ kosudong miagal id pasar ginumuan, pasar tani om longkod pomoobolian babarang kogugunoon karamaian.
“Ponginsomokan diti kapasaga’ kopogirotan kuasa’ koindalan miampai lobi kiwaya’ om laang osikap aanu kohondot ruputan mantad tongo’ moomoguno nung aantakan amu’ kotonudan,” ka disio ontok pinopoimpuun SHMMP Toun Wagu Sina id Sikul Ponit Kabansaan Sina (SJKC) Cheng Hwa, do hiti konihab.
Armizan pinoposorou do laang okodou maan onuo’ kohondot nombo-nombo mongindapu’ i amu’ kapananud tongo’ kooturan id siriba’ skim diti maya’ AKHAP 2011 om aanu ontokon danda’ do kuut gisom RM100,000 toi jiil amu’ katalib tolu toun toi goduduo dilo’ toi kompaun gisom RM50,000 montok minsosongulun.
Naamot montok komponi nopo, aanu mamadanda’ gisom RM500,000 toi kompaun gisom RM250,000.
Montok kasalaan amu’ kopodokot tanda gatang kiwotik ‘merah jambu’ montok babarang gatang pitamangan nopo, minsosongulun aanu mamadanda’ gisom RM10,000 toi kompaun gisom RM5,000 om montok komponi nopo, aanu mamadanda’ gisom RM20,000 toi kompaun gisom RM10,000.
Kapt:
