Jauteh Dikun (wanan) miampai di Luguan Pulis Watas Kudat, Superitendan Mohd. Haris Ibrahim (gibang) minonuduk asil rahat i naahou id kowoigan Kudat di kaawagu diti.
KOTA KINABALU: Pinongumbalan mogowit modiilisok asil rahat kaampai kinoring tonsi’ ponsu miampai gatang koinsanai lobi RM4.5 riong naanu minanalob id kowoigan Kudat di kaawagu diti.
Ka do Utusan Malaysia, Pesuruhjaya Pulis Sabah, Datuk Jauteh Dikun minoboros, kinapagahawan dilo’ winonsoi do Tinimungan Pulis Marin (PPM) ontok Op Taring Gelora doid kowoigan pialatan Pulou Banggi om Pulou Bangsi di ko 29tw Kohopod om Iso’ katatalib.
Minoboros isio, wookon asil rahat i naahou kaampai 300 karung toi 9,000 kilogram (kg) kinoring tonsi’ ponsu; 66 karung kulit kakahut om tuntul; kinoring ‘gamat susu’ om kinoring ‘kuda laut’ nogi’ kinoring ‘rumpai laut’.
Naahou nogi’ o puhabu sada’ om pipiro ponit suai kaampai kopi koritan nokoring.
Minoboros isio, di maso puru PPM mininsomok kapal dilo’ montok kopomorisaan nga’, kapal dilo’ pinokilangan om suminiau pinakaya’an id kowoigan oribau kumaa pogun sombol.
“Kapal dilo’ naanu minomogusa’ soira’ nokoundorong id koiyonon di oribau nga’, oinsanan notondosan tuminuhun id koiyonon oribau dilo’.
“Amu’ alaid mantad dilo, songinan bot poom minaganu di apat kusai dilo’ nokoidu’ kuminaa kowoigan sompomogunan,” ka disio.
“Di ontok pinonungodan do kapal dilo’, apat kusai diri tuminuhun mantad kapal dilo’ pinakaya’an id koiyonon kowotuan sabab oribau waig di ontok dilo’.
“Nga’ amu’ alaid talib dilo’, apat kusai dilo’ nanu di soningan bot poom do minogidu’ kuminaa id kowoigan sompomogunan,” k disio id kapahabaran doid Longkod Upis Pulis Kontinjen Sabah (IPK), konihab.
Ka disio, mantad pinomorisaan kohondot kapal di niduanan nokokito pipiro karung i kisuang mogisusuai mamamasi rahat kaampai mamaamasi di umoligan. Koinsanai asil rahat dilo’ kotumbyaan montok pidagangan ASEAN.
Jauteh minoboros, otumbayaan disio do koinsanai dilo’ okon ko’ mantad no doid Sabah om boogian disio otumbayaan koinsanai kusai di nokopogidu’ nopo dilo’ nga’ tulun songkosuayan.
Inggisaman aparagat winonsoi montok mogihum kaapat-apat notondosan. Kes diti id ponoriukan Koupisan Mamaamasi Lalang om PDRM monguhup nung pokionuon.
