Dr. Jeffrey Kitingan
KOTA KINABALU: Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Taakanon Sabah, Datuk Seri Dr. Jeffrey Kitingan mokianu Koporintaan Pisompuruan magadang kawagu papasaga’ Sabah mongudar wagas dau sondiri’ kumaa Sabah.
“Autonomi (kuasa’) montok mongulud kopongudaran om kopolobusan wagas okon ko’ montok kopokionuan nopo nga’ kopotutan montok Sabah do monoibau kopomogunaan pinotomod kosuul no om kotundunan mogigiyon miampai lobi kosonong,” ka disio id iso’ kointalangan do hiti di tadau baino’.
Dr. Jeffrey minoboros, kopomogunaan om koyuon Sabah nopo sopisuai kopio nung piadangon no do Semenanjung Malaysia.
“Pasanganu yahai do kokuasaan watas om kagarason montok mongulud pongudaran om kopolobusan wagas dahai sondiri kiguno id suang kaganaan kuasa’ dahai.
“Ponginsomokan ‘desentrelisasi’ (kapanahakan kuasa) miagal diti kapagaras do Sabah om Sarawak montok maganu laang di lobi kiwaya’ kumaa sitok om kopokionuan nokoiyonon, potilombus dino kapatantu’ mogigiyon tokou oonuan surupukaraja’ di lobi kosonong,” ka disio.
Montok papasanang koundolihon dilo’, Dr. Jeffrey pinapaatag sokukuri’ 50 pihatus mantad wagas nudar kiguno uludon do Sabah montok Sabah.
Minoboros isio, iti kapanahak kosiwatan kumaa Sabah montok popokito waya’ kapanamangan nokoiyonon kumaa sitok takanon dau, om amu’ monggungar koinsanai sistem di poinharo sodia’.
“Ilo’ kitonggungan sabaagi ralan tanga’ i kapasaga’ pogintongan om ponguludan tumanud pomogunaan,” ka disio.
Dr. Jeffrey nga’ minombohit sokodung po’ompus kumaa sistem monopoli (manalahan) id kopongudaran wagas sabab otumbayaan isio do okon nopo ko’ kopomorugi’ do ikonomi nga nogi’ amu’ ‘produktif’ (ogumu’ asil) montok koburuon Sabah om mogigiyon dau.
Minoboros isio, kino’aisoon piinsolodan id sistem monopoli, lolobi no i kopongumpadan toisoiso’ i oponsol miagal pangaba’ takanon, kopongimbulai koyuyuon di poinbanta’ kumaa amu’ kaparagaton om kolowongon.
“Pinoilo oku do monopoli diti amu’ opupusan do 2031. Nga’ kuasa’ miagal diti kopogowit kumaa koyuyuon di tinonggungan om pikikiro amu’ kapanahak koundaran kumaa rayat Sabah,” ka disio.
Minoboros isio, boros karait do pitopongan koowit kumaa amu’ kopulokiton nopo nga’ olomog.
“Sabalik dino, pitopongan koposuni ‘inovasi’ om kopulokison. Komponi om kotinanan, soira’ kotoguang do piinsolodan, ounsub montok mongulud kopoindalanan, mongingkuri’ amu’ kopulokison, om ki’inovasi,” ka disio.
“Id sunduk kopongudaran om kopolobusan wagas, iti kopogowit kumaa karalano’ pomutanaman lobi kosonong, asil di lobi kogumu’, om gatang di lobi ‘kompetitif’, kapanahak koundaran kumaa momoguno om papalabus,” ka disio.
