Jamawi (tanga’, poindikau) guminambar miampai oinsanan i nokotindapou id Ramai APC 2025, Komontirian Pomutanaman, Ponginsadaan om Pomorunan Akanon (MAFFI).
KOTA KINABALU: Montiri Pomutanaman, Ponginsadaan om Pomorunan Akanon, Datuk Haji Jamawi Jaafar minokianu oinsanan pakakaraja Komontirian do miuhup om manahak tonggungan poinponu’ id koponokodungan kopoindalanan Inggisaman Kebun Dapur, sabaagi laang monginggirot koumoligan takanon om pooingubas nubasanan mimpoopori id nayatan mogigiyon.
Minoboros isio, sokodung mantad oinsanan Upisor om sitaf Komontirian nopo nga’ oponsol kopuli do Haal pamalanan, kopoindalanan, kapanamangan nogi’ kopointutunan inggisaman diti kumaa mogigiyon.
“Puru Komontirian nuru’ sumili nuludan sogulu om ‘duta’ kumaa inggisaman diti, popokito poombitanan maya’ kogompitan, sokodung teknikal nogi’ kopointutunan di kiwaya’ id nayatan mogigiyon,” ka disio.
Inggisaman Kebun Dapur okon i ko’ Projik pomutanaman okoro’ nopo, nga’ karaja’ kosudong montok Popogoris suang Walai, mongingkuri’ kos balanja masi, nogi’ mongingkawas kopurimanan kohondot pomutanaman, ka disio pinopointalang ontok minoboros id Ramai Gaa’ Surupukaraja’ Cemerlang (APC) 2025 id Shangri-La Tanjung Aru, do hiti di kosodop.
Jamawi (kaapat, wanan) miampai tombului apantang guminambar pongingitanan miampai tongo’ mamaramit Gaa’ Surupukaraja’ Cemerlang MAFFI montok toun 2025.
Jamawi pinoposotol nogi’ do kalantaion Komontirian id siktor pomutanaman, Ponginsadaan om Pomorunan Akanon tumanud di kopulokison, tinonggungan om kogompitan pakakaraja’ Koporintaan.
Pinosotol disio do naangayan osonong okon i ko’ kopohompit nopo naangayan KPI, nga’ nogi’ kopuli do pogoyuon abaal, kopulokison sistem kapatahakan, tinonggungan om ginoris manalasai kobolingkahangan rayat miampai kiwaya’.
“Mositi’ tokou tumilombus popoingubas naangayan akawas, sumimban mantad karaja’ noubasanan kumaa karaja’ i kapanahak waya’ otopot kumaa komontirian om mogigiyon,” ka disio pinoposotol.
Jamawi nga’ pinoposotol nogi’ do koyuon ‘sifar’ montok kalawason, kolowongon om pomogunaansala’ kuasa’, pinoposorou di mamaramit APC 2025 montok sumili turianan (role model) nogi’ pongunsuban kumaa sinakagon tumungkus do pakakaraja’ Koporintaan.
Minoboros isio, Komontirian nga’ tumilombus monginggirot koburuon modal insan, pintoriningan pitopongan, kopoinggirotan pomuruanan om kopoubasanan ‘inovasi’ id surupukaraja’.
“Kalansanan ku oinsanan Puru Komontirian tumilombus papagaras komilaan tinan, monokodung ababayan transformasi surupukaraja’, momoguno nubasanan karaja’ iso’ tinimungan om manahak surupukaraja’ bobos osonong kumaa rayat,” ka disio.
Jamawi (tanga’) minamaramit tandamato mantad di Leonard om poingintong i Maria (wanan).
Ramai APC diti nga’ kosili nogi’ Koiyonon montok mongunsikou Upisor om sitaf i pinopokito naangayan karaja’ poinlobi-lobi, tinonggungan akawas om sunduan karaja’ di abantug.
Jamawi minanangkabayahan kumaa oinsanan mamaramit APC 2025, pinoposotol do kinalantaion diolo’ nosili kokitanan nubasanan karaja’ abantug om kinaangayan akawas nokoluhub id Komontirian.
Pinoposorou isio do kinalantaion tadau diti nuru’ silihon poninong sunduan montok lumaang lobi kosodu’, okon ko’ ‘noktah’ naangayan.
“Kumaraja’ tokou okon ko’ montok gaa’ nopo, nga’ montok tonggungan om rayat,” ka disio pinoposotol.
Nokotindapou nogi’ i Monguhup Komontirian Pomutanaman, Ponginsadaan om Pomorunan Akanon, Datuk Haji Ruslan Muharam om Datuk Hendrus Anding; Monunurat Pointatap Komontirian, Datuk Leonard Stephen Poyong; Kumoduo Monunurat Pointatap (Ponginsadaan om Tayam) Komontirian I po nogi’ Ponorikohon Puruankuasa’ Kopoindalanan Ramai Gaa’ Cemerlang MAFFI toun 2025, Maria David Edick nogi’ tongo’ Luguan Koupisan om kotinanan id siriba’ MAFFI.
