Dr. Joachim (koduo, wanan) minamaramit tandamato mantad China pinotunui di Carmen Wong (koduo, gibang), om poingintong i Timbang Presiden Koisaan Plumber Sabah, S P Teo (gibang) om Upisor Pinotomod, Shane Goon.
KOTA KINABALU: Kumoduo Boyoon Montiri I po nogi’ Montiri Karaja’ Agayo om Utiliti, Datuk Seri Dr. Joachim Gunsalam minamaramit kopointalangan pinotomod asil kinotombuluyan karaja’ mongongobi’ Koisaan Plumber Sabah kuminaa Beijing, Republic Rakyat China, di kaawagu diti.
Presiden dilo’, Carmen Wong minoboros, kinotombuluyan dilo’ kituduan monginggirot pihunungan nogi’ mongukab kosiwatan piuhupan id siktor wait pialatan Sabah om bohogian poinhompit id China.
Ka disio, kinotombuluyan dilo’ kopuli do kopohompitan abaal miampai Beijing Municipal Water Authority om Beijing Waterworks Group, miampai pinibarasan moningkanan kumaa koponguludan wait, sistem pangaba’ wait, pongusapan sampal wait nogi’ ponginsomokan koponguludan utiliti i gunoon id China.
Ka disio, piilangan dilo’ kapanahak kokitanan poinpuli karait nubasanan bobos osonong, pomogunaan tiknologi kaawagu nogi’ model ponguludan i kikosiwatan silihon turianan montok gunoon id Sabah.
Suai dilo’, ka disio, tuduan kopio nopo kinotombuluyan id Beijing nga’ pinoporikot kapagalapan pinotomod kumaa bohogian kikuasa’ nogi’ pongindopuan kopohompit siktor waig mantad China montok tumanud Forum om Pokikitanan Waig i nakatantu’ kapanau id Sabah do ko’ 25 om ko 26tw Kaapat diti.
Kotombuluyan dilo’ kopohompit pibabarasan osopung karait atag uhu forum, Pokikitanan tiknologi nogi’ koyuon kotonudan do bohogian sompomogunan.
Tinonudan Koisaan Plumber Sabah nga’ pinapaharo nogi’ kinopohompitan miampai mongobi’ pongindopuan mantad mogisusuai kinoiyonon doid China id Ningxia Mansion, Beijing.
“Pinibarasan kopuli do koburuon pomorunan, ginoris kapamansaian nogi’ kosiwatan piuhupan id kaganaan infrastruktur om tiknologi waig,” ka disio.
Id kinotombuluyan dilo’, koisaan nakaramit nogi’ tandamato mantad Beijing Waterworks Group sabaagi ponokotanda piromutan osonong om asil osonong pinialanan pomusarahan po’ompus kinotombuluyan dilo’.
Miampai oinsanan, kopointalangan asil kinotombuluyan dilo’ pinoposodia’ sukuon oponsol id kopomorotian kinoburuon kaawagu, tiknologi nogi’ model piuhupan siktor waig id China.
Naamot dilo’, i Dr. Joachim pinopolombus sokodung kumaa inggisaman po’ompus montok mongukab piuhupan di kosudong om ogirot id kaganaan kogogonopan waig, utiliti ginumuan om nogi’ pialanan komilaan abaal, kopiongoi di kopomogunaan koburuon timpu anaru om kasasanangan rayat Sabah.
