Hajiji minintong dilo buuk Palan Koburuon Sondikoton SMJ 2.0 katalib pinopoimpuun dilo’ id Ababayan Amanat Boyoon Montiri kumaa Pakakaraja’ Koporintaan id Pogun Sabah om Kinopoimpuunan SMJ 2.0 di tadau baino’.
KOTA KINABALU: Koporintaan pogun miampai pohimagon pinopoimpuun Sondikoton Sabah Maju Jaya (SMJ) 2.0 montok timpu 2026-2030, miampai rikoton koposindakan ginoris tumopong, nimbulaian om gatang ikonomi pogun.
Boyoon Montiri, Datuk Seri Haji Hajiji Haji Noor minoboros, SMJ 2.0 nopo nga’ kopongoputan om kotilombuson di SMJ 1.0 i minoningkanan pinonondulian, kapaadagang om ponguludan kawagu katalib tomporuruol om Pomilian Agayo Pogun ko-17 (PRN17).
“SMJ 2.0 okon ko’ palan koburuon nopo. Ilo’ kokitanan tonggungan Koporintaan momuruan kosimbanon id pomogunan di koburu’ osiau, unsubon di komilaan winonsoi (AI), ikonomi digital, pidagangan padarapas piwolitan om pogitotopongan global.
“SMJ 2.0 pinalan maya’ kohompmitan poinpuli kapaampai Kabinet Pogun, Komontirian, papamanau Pomorunan, tinimungan komulakan om koinsanai nayatan mogigiyon,” ka disio id Ababayan Amanat Boyoon Montiri kumaa Pakakaraja’ Koporintaan Pogun Sabah om Kinopoimpuunan SMJ 2.0 id Longkod Konvensyen Sompomogunan Sabah (SICC) do hiti, di tadau baino’.
ka di Hajiji, Bajet Pogun 2026 pinopoobi’ RM12.02 billion montok mamalanja’ 1,173 ababayan om Projik koburuon, bobos akawas id susuyan kahandaman Sabah, kopiongoi di kopoindalanan Palan Malaysia Ko-13 (RMK13) om angkab Malaysia Madani.
ka disio, palan diti nga’ nulud om mananud Sondikoton Koburuon Mampan (SDG) om prinsip Sandad Posorili’, Sosial om Kopoindalanan (Environmental, Social and Governance -ESG) montok papatantu’ koburuon ogirot om kasasanangan sosial.
Ka disio, SMJ 2.0 nga’ monimbuat nogi’ tonggungan om manifesto Gabungan Rakyat Sabah (GRS) di PRN17 , mimpau apat tukod agayo ilo’ nopo nga’: Sabah First, Sabah Forward, Sabah Prosper om Sabah United. Limo tuduan palan diti nopo nga’: monuridong mogigiyon osompuru om oulud; mongingkawas asil pogun; popogisusuai ikonomi; mongingkawas ikonomi rayat; om popoburu’ modal insan.
Boyoon Montiri pinoposotol, palan dilo’ poguraon maya’ tolu impohon agayo ilo’ nopo nga’; Siktor Kosunion Ikonomi i moningkanan kumaa Pomorunan, Ponombuluyan om Pomutanaman; Koburuon Modal Insan om Kasasanangan Rayat, kapaampai balajaran, TVET, STEM, pintoriningan pomutanaman om digital;; Piromutan Infrastruktur om Kopomogompian Otomou, kopuli do infrastruktur asas, ginoris poinggompi’ om sandad posorili’.
Ka disio, kotolu-tolu impohon dilo’ sokodungon tingkananon kumaa Ikonomi Obulou, Pendigitalan AI om Koburuon Inklusif, nogi’ kosiau di limo kaanu pogoris agayo ilo’ nopo nga’ Kogiroton fiskal, kogogonopan kousinan, waya’ Surupukaraja’, kopoindalanan kitonggungan om koporintaan digital.
Id siktor Pomorunan, ka di Hajiji, Sabah nakalantoi minongimbayat kopoopuan hinapadan billion ringgit, kapaampai Projik Esteel Enterprise Sabah Sdn. Bhd. Kigatang RM31 billion id Taman Pomorunan Tumau om Gas (SOGIP), Sipitang, pikikiro kopongimbulai 10,000 pakarajaan kikomilaan akawas nogi’ monginggirot Piromutan pangaba’ pomorunan keluli id Sabah.
Suai dilo’, ka disio, koporintaan monginsikap koburuon ponginsonongan Taman Pomorunan strategik id KKIP, SOGIP om POIC Lahad Datu, suai ko’ mamalan Pelan Induk Pomorunan Kudat montok Ikonomi Obulou, naamot duo taman wagu id Kota Belud–Kota Marudu om Beaufort-Kimanis pinalan montok monginggayo kosiwatan koburuon watas.
ka disio, inggisaman SME-UP momorikot 600 mongingindapu’ Pomorunan Okoro’ om Gonsuhatan (IKS), kapaampai koburuon sistem data perkilangan om Ababayan Sabah Ready to Eat (RTE) montok popoinggayo pidagangan produk nokoiyonon.
Minoboros isio, siktor ponombuluyan kopokito kinotondulian di kounsub kopio, miampai somok 10 riong tutumombului nokosurat id timpu limo toun.
ka disio, kopiongoi di Toun Monombului Malaysia 2026 om Visit Sabah Year 2027, Koporintaan moningkanan do ponombuluyan osonong, produk ‘premium’, ababayan Sompomogunan om sitandod surupukaraja’ global kaampai ASEAN Tourism Standard dumontol 2030.
ka disio, pomogompian tungkusan, koubasanan om sandad posorili’ onuan kopomodulianan maya’ koburuon Longkod Koubasanan Kinarut, Kounsol Seni Pogun Sabah, Koiyonon Tungkusan Pomogunan UNESCO om Taman Teluk Darvel, miampai kinopoobian RM444.69 riong id siriba’ RMK13.
“Rikoton rontob kosukupan tinan (SSL) watas koingkawas mantad 30% kuminaa 60% dumontol 2030 maya’ Ababayan Revolusi Parai id onom watas, koposodiaan injin wagu kigatang RM15 riong om kopoburuan Sabah Agricultural Biotechnology Centre (SABTeC) id Tuaran.
“Sub siktor Pomutanaman momorikot 25% SSL ruminan dumontol 2030 maya’ Ababayan Pomukobunan Kontrak, naamot Ponginsadaan posiahon maya’ Ikonomi Obulou Sabah miampai koingkawason potindalan sada’, dodopiton om koburuon kopiromutan ‘hiliran’,” ka disio pinoposotol.
