Jamawi (poindikau, tanga’) guminambar miampai tombului apantang om oinsanan puru karaja’ MAFFI id Ababayan Amanat dilo’.
KOTA KINABALU: Komontirian Pomutanaman, Ponginsadaan om Pomorunan Akanon (MAFFI) tumilombus monginggirot koumoligan akanon nogi’ rontob kosukupan tinan pogun miampai mongingkuri’ katalahanan kumaa pongudaran taakanon do momorinut maya’ kopoingkawasan kopolobusan nokoiyonon.
Montiri dilo’, Datuk Jamawi Jaafar minoboros, laang diti i po nogi’ tingkananon kohunung kumoiso’ komontirian moningkanan kumaa kopolobusan parai om wagas, siktor pomutayaman miagal sapi om manuk, suai ko’ tongo’ kinotuan nogi’ ponginsadaan montok mamajamin kaadangon gatang, kotilombuson pangaba’ om kotundunan rayat.
Kopitanud inggisaman dilo, pinosotol disio kogunoon mongingkawas asil nimbulayan om nogi’ monginwagu siktor pomutanaman om ponginsadaan miampai mongingkuri’ katahalanan kumaa karalano’ kinoubasanan.
Minoboros isio dilo’ ontok pinapatahak pason kumaa Kounsol Amanat Montiri Pomutanaman, Ponginsadaan om Pomorunan Akanon Sabah nogi’ Pamaramaian Toun Wagu 2026 id Lintuhun Mogisuaiguno Wisma Pertanian Sabah, do hiti di tadau baino’.
Ka di Jamawi, koporintaan pogun poposotol siktor pomutanaman, ponginsadaan om pomorunan akanon sabaagi tukod osonong koburuon pogun, okon nopo ko’ montok mamajamin koumoligan taakanon, nga nogi’ montok monginggirot kinasangalon ikonomi om mongimbulai nindopuan mogigiyon labus kakadayan.
“Koinsanai palan om kopoindalanan komontirian dilo’ mositi’ no kopiongoi di ababayan Sabah Maju Jaya (SMJ) nogi’ inggirotan maya’ piuhupan oronit pialatan koporintaan pogun om Pisompuruan,” ka disio.
Jamawi minoboros, kosimbanon kumaa pomutanaman ‘pintar’, pomogunaan ‘mekanisasi’, kopomutanaman i osonong nogi’ pomogunaan ‘data’, tiknologi om ‘inovasi’ nuru’ insikapan maya’ piuhupan kohunung miampai univositi nogi’ kotinanan ponolidikan.
Jamawi (wanan) ruminuba’ om tuminabi’ dilo’ sitaf MAFFI ontok suminuang id Lintuhun Mogisuaiguno, Wisma Pertanian.
Minongomi kogompitan komulakan, minoboros isio, timpu dumontol siktor pomutanaman om ponginsadaan Sabah lumansan kopio di sukod wagu om siktor dilo’ nuru pouludon sabaagi karaja’ di kiginoris komogot, kibantug om kopountung.
“Koporintaan pogun tumilombus monokodung koburuon ‘agropreneur’ komulakan, papagaras pongindopuan om koperasi wagu nogi’ monginsonong koromuton kumaa tana’, pongusinan om sokodung teknikal,” ka disio.
Id timpu miagal, kopogorisan momutanom, monginsada’ om mogigiyon labus kakadayan kotilombus tingkananon kopio montok mongingkawas nindopuan tinimungan buntukon nogi’ mongingkuri’ katalahanan kumaa tulun tanga’.
Pinosotol po nogi’ di Jamawi koponsolon kopoindalanan di osonong, sistem kapatahakan di opulokis om ronotb tinonggungan di akawas miampai koponimbangan ‘sifar’ kohondot kalawason om amu’ kopulokison.
Kalansanan disio oinsanan upisor komontirian, koupisan om kotinanan id nayatan pogun om pisompuruan kipogoyuon ‘proaktif’, mooi id kinoiyonon om kitonggungan manalasai kobolingkahangan rayat miampai poinggirot.
Suai dilo’, piuhupan pialatan kotinanan nuru’ inggirotan miampai momiduo ‘silo’ id pialatan koupisan, kotinanan pisompuruan, komponi poinhompit koporintaan om siktor swasta maya’ piilangan koporintaan-swasta.
Minongomi kaantaban kosimbanon iklim, ka disio, komontirian mongunsub nubasanan pomutanaman poinggompi’, pomogunaan tanom asangal ‘iklim’ nogi’ pomogunaan tana’ miampai kitonggungan.
Montok papatantu’ oinsanan inggisaman kosigampot sondikoton, ka di Jamawi, kapatatapan potuduk naangayan agayo (KPI) di atalang maan poindalano’ id nayatan koupisan, kotinanan om luguan ababayan, pitonggoyon di kapanamangan nogi’ koporuputan kitimpu.
Jamawi (tohuri, tanga) nogi’ tombului apantang suai suminasi kinopomutulan kek bagas Potunud DVS, Dr. Mary Josephine S. Golingai (toguang, wanan) om bagas Monijor Agayo Koperasi Pembangunan Desa, Jamilah Lee i momupus surupukaraja’ diolo’.
Id haal poinhompit, ka di Jamawi, MAFFI popoimpuun Inggisaman Kebun Dapur miampai kinuludan id pototongkop Sabah montok mongunsub suang walai, kosuul no id koiyonon labus kakadayan om poonsokid, momumutanom, momogompi’ tayam om ponginsadaan id tukuran di okoro’.
Inggisaman dilo’, ka disio, kaanu kosili posunduran kumaa kojominan takanon, pongingkurian kos balanja’ masi nogi’ kopoingubasan kopimpooporian id nayatan mogigiyon doid kogumuan.
Minoboros isio, Inggisaman Jelajah Kebun Dapur kumoinsan maan poimpuuno id watas Tuaran om pohimogonon di Boyoon Montiri do wulan tiso’, suai ko’ poindalanon momoguno ponginsomokan ‘mentor-mentee’ montok mongimbayat kororohian sukod wagu.
“Komontirian nokopongintutun nodi tongo’ mentor pomutanaman di kinaangayan om popohompit diolo’ id Inggisaman Jelajah Kebun Dapur.
“Maya’ pangahakan miampai mitilombus, kiangkab tokou mongimbulai lobi kogumu’ agropreneur omulok i okon nopo ko’ komilo id sunduk teknikal, nga’ opulokis id koponguludan om kapadagangan.
“Inggisaman diti kapanahak pabantaan kumaa tiknologi pomutanaman pintar (Smart Farming), automasi om pomogunaan Internet Benda (Internet of Things), kopiongoi di ababayan popoinwagu siktor pomutanaman Sabah,” ka disio.
Id Bajet 2026, MAFFI pinoobian RM559.85 riong, potilombus dino kopokito tonggungan koporintaan pogun id koposiahan siktor pomutanaman montok kasasanangon momutanom, momutayam, monginsada om mongindapu’ tani.
Nokotindapou nogi’ i Monguhup Montiri MAFFI I om II, Datuk Haji Ruslan Muharam om Datuk Hendrus Anding; Monunurat Pointatap Komontirian, Datuk Leonard Stephen Poyong; Monijor Agayo LIGS sabaagi Ponorikohon Manganjur Ababayan Amanat, Sabdil Tanjong om tongo’ kumoduo monunurat pointatap komontirian.
