Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor lumansna do rayat tumilombus manahak sokodung ouli’ om sumili ponokokungsi montok monigampot abbaayan koburuon koporintaan pogun.
“Angkab ku sabaagi Boyoon Montiri nopo nga’ montok poloting waya’an koburuon montok Sabah om Rayat. Kohondot dilo’, sokodung po’ompus nopo nga’ oponsol montok kotilombuson koburuon rayat om pogun diti,” ka disio id ramai kinopoimaganan Festival Sayau Naga, Unicorn om Singa id Longkod Konvensyen Sompomogunan Sabah (SICC) do hiti di tadau baino’. Teks boboroson disio pinolombus di Monguhup Montiri kumaa Boyoon Montiri, Datuk Ceasar Mandela Malakun.
Mandela miampai di Wong, tombului naalap nogi’ koisaan om lansanon mogigiyon Cina minonuntung gandang ponokotanda’ kinopongukaban festival.
Boyoon Montiri minamarayou nogi’ do Koisaan Mogigiyon Cina Sabah Bersekutu Kota Kinabalu (USCCAKK) tu’ nakalantoi pinapaanjur festival dilo’ montok toun diti do mamaramai Toun Wagu Sina 2026.
Minoboros isio, USCCAKK miampai pointatap manganjur ababayan diti pointonod pipiro toun potohuri diti, nokoposili dilo’ do iso’ kapamaramaian koubasanan tuon-toun i piindad-indadan okon nopo ko’ mogigiyon Cina, nga i mogisusuai nayatan mogigiyon id Sabah, nogi kitonggungan sabaagi impohon montok posuni pihunungan om sopiramit id koponuridongan timpu dumontol oinsanan.
“Ilo’ pogi’, pamaramaian kararamaian om koubasanan id nayatan mogigiyon Sabah mantad mogisuai ugama’, tinaru om koubasanan nopo nga’ kointutunan olumis id pogun diti.
“Id Sabah sondiri, pamaramaian koubasanan om kararamaian tikid tinaru nosili no do ababayan toun-toun om nubasanan. Ilo’ nopo nga’ impohon montok mongingkawas pisompuruan om piuludan di poinharo id nayatan mogigiyon mogisuai tinaru id nayatan rayat orukut tinaru nogi’ ugama’ id pogun diti,” ka disio.
Tumanud Zodiak Cina, toun 2026 nopo nga’ Toun Kuda Tapui om pisowiton di kosimbanon, ‘inovasi’ om kinobulunon nogi’ popouyu kosiwatan agayo.
“Kohondo dilo’, sunduan om ginoris saalom Toun Kuda diti nuru’ do onuon tokou montok mogowit lobi kogumu’ koburuon ikonomi, sosiol om kasasanangna rayat id pogun diti.
“Koporintaan pogun orohian popoilang visi angkabon diti om komogot nogi’ monilombus ababayan kopotundaan montok mononduli’ ikonomi, popoindalan palan nogi’ mogihum kosiwatan di osonong montok pogun om rayat,” ka disio.
