Jamawi (poindikau, tanga’) guminambar pongingitanan miampai tutumanud i nokotindapou id Sesi Libat Urus i kopohompit momumutayam manuk nokoiyonon, mongungudar manuk nogi’ pengilang takanon tayam.
KOTA KINABALU: Montiri Pomutanaman, Ponginsadaan om Pomorunan Akanon, Datuk Jamawi Jaafar minonorikohon Sesi Libat Urus Pomorunan Unggas id Wisma Pomutaman, do hiti, di tadau baino’.
Sesi dilo’ naampai do 73 tulun kapaampai do momumutayam manuk nokoiyonon, mongungudar manuk om pengilang takanon tayam id inggisaman mongulud kobolingkahangan pangaba’ om gatang pidagangan.
Nokotindapou nogi’ i Monunurat Pointatap Komontirian, Datuk Leonard Stephen Poyong; Potunud Koupisan Surupukaraja’ Veterinar Sabah, Dr. Zul Bahar Haji Abdul Rashid; Presiden Koisaan Mongungudar Takanon om Daging Pinosogit Sabah, Lim Young Peing om i Ponorikohon Rastamas Group, Datuk Md. Tahir Picho i po nogi’ mongingindapu’ manuk.
Ka di Jamawi, bohogian disio karati kogunoon montok mongudar bohogian manuk atantu’ kosuul no palapa’, po’o om kawo montok momogonop kopokionuan pidagangan om kogugunoon pomorunan takanon.
Jamawi (tanga’), Leonard (wanan) om Dr. Zul (gibang) guminambar om minongigit produk tontolu’ manuk.
Id timpu miagal, pinosotol disio do oinsanan popoburu’ pomorunan mositi’ no do mananud kooturan di pinatatap koporintaan kaampai id sunduk status ‘halal’, kopotontuan gatang nogi’ kogunoon mongudar manuk mantad labus pogun.
“Komontirian tumilombus papatantu’ momogompi’ nokoiyonon oonuan koposuulan om sokodung id inggisaman papatantu’ pangaba’ tonsi’ manuk om tontolu’ manuk pogun diti kakal ogonop,” ka disio.
Minoboros i Jamawi, Komontirian disio kaakun nogi’ monuridong puruankuasa pibabarasan id pialatan mongindapu’, mongungudar om pengilang takanon tayam montok papasanang pirundingan miampai sopikalantoi montok mamagampot tuduan di pinatatap id Sesi kopohompitan karaja’ dilo’.
Iti nosusuhut atag di Md. Tahir mooi do iso’ puruankuasa kopohompit tolu bohogian agayo ilo’ nopo nga’ momutayam nokoiyonon, mongungudar om papalabus akanon tayam turidongon montok mongulud Haal pangaba’ om gatang miampai pogiupakatan.
I Jamawi pinopoilo nogi’ do Komontirian disio papaharo mitingan sokukuri’ intolu sombulan montok monguhup papatantu’ kopolobusan nokoiyonon di lobi ogirot om rikoton rontob kosukupan tinan (SSL) 100 pihatus osigampot.
Pinosotol disio do minggisom isio popoindalan tonggungan miampai poinsonong montok koponsolon rayat Sabah.
Naamot dilo’, i Lim minongomi Sesi kopohompitan karaja’ dilo’ sabaagi i kumoinsan nogi’ pohoroo’ om minongunsikou kumaa di Jamawi tu’ minonimung koinsanai popoburu’ pomorunan montok mogiboboros miampai Poingukab miampai montiri.
