KOTA KINABALU: Ponguhupan osikap i pinahabar di Montiri Balajaran, Sains, Tiknologi om Inovasi, Datuk James Ratib kumaa Sikul Kabansaan (SK) Rampayan doid Menggatal i noumpadanan gama-gama’ liyud di kawagu diti, nokorikot id Sikul dilo’ di tadau baino’.
Ponguhupan dilo’ kapaampai do kakamot oponsol kaampai perabot montok pongolon kogogonopan i naraan gama-gama’ kadaat dilo’.
Koinsanai ponguhupan nulud miampai Upis Balajaran Pogun Sabah montok papatantu’ susumikul om mongingia’ koguli’ mindalan sesi pinsingilaan id koyuon di lobi osimbayan om oumolig.
Suai dilo’, ponguhupan suai i pinahabar pogulu diti maan patahako’ miampai mogisusuhut om pikikiro kosusuhut id timpu toruhai, kopiongoi di tonggungan Koporintaan pogun montok papatantu’ kapapanahan do karaja’ koponondulianan Sikul ngaawi’ i noumpadanan aanu papapanau do poinpuli.
