PENAMPANG: Longkod Upis Pulis Watas (IPD) Penampang nakapanahan songulun kusai nokoiyonon kiumur 39 toun tu’ kotumbayan nokohompit id kes mongumpadan kopohompit kabel Telekom Malaysia (TM) id Watas diti, di minsusuab baino’.
Luguan Pulis Watas Penampang, Superitenden Sammy Newton minoboros, pinomogombitan dilo’ winonsoi mantad kointalangan ginumuan om pinonoludukan pinotomod Tinimungan Pakakaraja’ Pinotomod Kes Manakau Kabel i tinuridong do Balai Pulis Penampang.
Ka disio, so tinimungan pulis nokokito so tinimungan kusai i masaan mongotob kabel telekom id Jalan Taman Bulan pogulu di notondosan minogidu’ suminakai songinan padsakaian.
“Nosusuhut dilo’, naantakan pinigusaan id koiyonon Penampang gisom id Kota Kinabalu miampai ponguhupan puru padsakaian peronda pulis (MPV) IPD Kota Kinabalu,” ka disio id kointalangan di tadau baino’.
Minoboros isio, asil operasi dilo’, songinan padsakaian i kotumbayaan ginuno di notondosan naanu minanahan naamot pipiro tambalut di notondosan suai nokoidu’ om noondo diti masaan ihumon.
Ka disio kawagu, pulis nga’ minagahou nogi’ pipiro babarang kotumbayan kopohompit kes wookon dilo’ songgulung kabel telekom, kakamot pomutul bosi’ om songinan padsakaian montok ponoriukan kotilombus.
“Pinogintangan potilombus nokoilo do i notondosan kiharo rikod kasalaan laid kopohompit pomogunaan dadah id siriba’ Seksyen 15(1)(a) om Seksyen 12(2) Akta Dadah Koligogon 1952,” ka disio pinopointalang.
Ka wagu di Sammy, kes soriukon id siriba’ Seksyen 431A Kanun Keseksaan i koowit ukuman jiil toi danda toi goduduo dilo’ nung gompit kasalaan.
Pinokianu disio tulun ginumuan i kiharo nunu-nunu kointalangan kohompit kes diti toi nombo-nombo kes kasalaan suai do papatahak kointalangan kumaa pulis id doros-oros montok monguhup ponoriukan.
