Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minoboros, toun 2026 mongukab bolikan wagu montok dati’ tumilombus mamanau kumaa toguang miampai angkab di ogirot om sunduan kopogi’isaan.
Minoboros isio, Koporintaan pogun poinsodia’ poinponu’ do popoindalan palan koburuon Sabah Maju Jaya (SMJ) 2.0 di koposimbayan, kopotonggoi ngaawi’ om poinpuli, montok papatantu’ komogoton di po’ompus nogi’ timpu dumontol di lobi kanawau om kiginoris tumopong montok Sabah.
“Mintong kawagu toun 2025, ilo nopo nga’ toun di osonong, tinuridong mimpau koburuon di ogirot om komogoton di ouli’ maya’ kopoindalanan palan koburuon Sondikoton Sabah Maju Jaya (SMJ) 1.0.
“Koporintaan pogun monilombus waya’an diit maya’ Sondikoton SMJ 2.0, miampai monginggirot tonggungan dahai kumaa pisompuruan, komogoton om koburuon poinpuli, mooi do komogoton di osigampot opurimanan miampai aadang do oinsanan rayat Sabah,” ka disio id pason Toun Wagu 2026, di tadau baino’.
Boyoon Montiri do insan po minonongkounsikou kumaa oinsanan rayat Sabah mantad mandat wagu i pinatahak montok tumilombus momuruan pogun diti.
“Mamagatang yahai kopio kotumbayaan om sokodung diti om ilo nopo nga’ iso tonggungan Agayo maan dahai poindalano’ miampai poinponu’ tonggungan.
“Miampai mandat di wagu diti, Koporintaan pogun tumopot do monginggirot kopomorintaan, papatantu’ kaadangon pulitik di po’ompus om posiau koburuon ogirot montok kasasanangang rayat.
“Po’ompus limo toun di nakatalib, inggisaman po’ompus montok mongimbulai kaadangon om pososorili’ di koposimbayan nokopomiuwa’ asil di atalang om kapanahak koundaran kumaa pogun,” ka disio.
Boyoon Montiri lumansan oinsanan rayat Sabah aga’an kolidasan di osonong, kasasanangan om nogi’ kalantaion.
“Miampai oinsanan nuludan montiri kabinet pogun, poinponu’ ginawo ku do mamason kopisanangan mamaramit toun wagu kumaa oinsanan,” ka disio kawagu.
