KOTA KINABALU: Suruhanjaya Pomilian Agayo Malaysia (SPR) di tadau baino’ pinopoimagon do naantakan kokusungan au’ nopikiikiraan montok timpohon Parlimen P.187 Kinabatangan om Lintuhun Undangan Pogun (DUN) N.58 Lamag nosusuhut kinoiduan pogun mongingigit goduduo dilo’, Allahyarham Datuk Seri Bung Moktar Radin.
Monunurat SPR, Datuk Khairul Shahril Idrus minoboros, bohogian disio nakaramit kopoilaan pinotomod mantad di Molohingon Dewan Rakyat, Tan Sri Dr Johari Abdul di ko 8tw Kohopod om Duo, nogi’ Speaker Lintuhun Undangan Pogun (DUN) Sabah, Datuk Seri Kadzim M. Yahya di ko 9tw Kohopod om Duo 2025.
Minoboros isio, kopiongoi di Perkara 54(1) Perlembagaan Pisompuruan om Perkara 21(5) Perlembagaan Pogun Sabah, kokusungan amu’ nopikiikiraan montok goduduo timpohon dilo’ nuru’ suangan id suang timpu 60 tadau mantad tadau dilo’ do pinoimagon SPR.
“Kohondot dilo’, SPR papaharo iso’ Mitingan Pinotomod do ko 16tw Kohopod om Duo 2025 (tadau Koduo). Mitingan maan ponorikoho’ di Ponorikohon SPR, Dato’ Sri Ramlan Dato’ Harun montok montok mogiboboros tadau di oponsol Pomilian Agayo Okoro’ (PRK) Parlimen P.187 Kinabatangan om PRK N.58 Lamag,” ka disio id iso’ kopointalangan.
Kad isio, mitingan dilo’ monorisid kopotontuan tadau Writ Pomilian Agayo, Tadau Pomungaranan Calon, Tadau Pongundian, Rojistor Momimili’ i gunoon nogi’ koinsanai posodiaan suai i gunoon montok popoindalan do PRK.
SPR nga’ pinopoilo nogi’ do iso’ kapahabaran media maan pohoroo’ soira’ nopo opupusan Mitingan Pinotomod dilo’.
