Dr. Bonaventure Boniface (kotolu, gibang) guminambar miampai pakakaraja’ media.
PENAMPANG: Calon Gabungan Rakyaat Sabah (GRS) montok timpohon Lintuhun Undangan Pogun (DUN) N14 Tamparuli, Dr. Bonaventure Boniface lumansan mongungundi’ omulok kiumur 18 toun i kopongundi montok kumoinsan nogi’ momoguno kosiwatan montok momili’ koporintaan i kapanahak koponsolon kumaa komulakan.
“Koporintaan GRS no i koposodia mogisusuai ‘insentif’ om ponguhupan kumaa sukod wagu. Id manifesto GRS, 10 mantad 16 ‘strategi’ moningkanan kumaa koburuon komulakan. Ko 29tw Kohopod om Iso’ diti, mintuhun togumu’ om undio’ no Gabungan Rakyat Sabah,”ka disio soira’ rinubaan ontok kotombuluyan doid Longkod Media Pomilian Agayo Lintuhun Undangan (PRU DU) Sabah ko-17 id The Majulan Hotel do hiti, di tadau baino’.
Pinapawalad nogi isio limo tukod agayo visi dau montok popoburu’ Tamparuli, miampai poposotol ababayan kopotundaan ikonomi,, balajaran komulakan, infrastruktur, koubasanan nogi’ kopoindalanan mimpau kohompitan rayat.
Ka disio, kopouyuhan dilo’ pinogura’ maya’ slogan “Komuniti Bersatu, Tamparui Maju” (Mogigiyon Misompuru, Tamparuli Koburu’” sabaagi posunduran koburuon poinpuli watas dilo’.
“Tadau diti orohian oku popouyu surupu karaja kumaa rayat Tamparuli maya’ slogan Komuniti Bersatu Tamparuli Maju. Mogowit oku limo tukod kopoburuan i noulud miampai osonong tu’ haro no palan tokou om kopoindalanan,” ka disio.
Tukod kumoiso, moningkanan kumaa koburuon ikonomi om inovasi i kopongukab kosiwatan wagu id tikid kapung montok mongingkawas nindopuan mogigiyon nokoiyonon.
“Tikid kapung haro kosiwatan montok mongingkawas ikonomi. Bobos oponsol, tikid nayatan mogigiyon – koonduan, komulakan om sukod wagu – nuru’ kiharo nindopuan tikid wulan di po’ompus,” ka disio.
Tukod koduo nopo nga’ moningkanan modal insan om balajaran komulakan, kaampai waya’an balajaran akawas om pintoriningan komilaan.
“GRS nokoposodia mogisusuai ponguhupan om sikulasip. Potontuon tokou tangaanak Tamparuli i kosudong mamaramit ponguhupan diti. Montok komulakan i orohian id komilaan, monuridong tokou ‘Institut Kemahiran Belia Tamaruli’ miampai kurusus kosudong miagal mongundar mutusikol, manaat walai, elektrikal om kapamansaian kek,” ka disio.
Monilombus ababayan koburuon poinharo mantad, Dr. Bonaventure minoboros, tukod kotolu moningkanan kumaa infrastruktur om pendigitalan.
“Tumilombus tokou monginsonong ralan kampung, kaampai ralan pomutanaman, suai ko’ papatantu’ kogogonopan miagal waig, lotirik om sumbu ralan aanu mongingkawas,” ka disio.
Pinosotol nogi disio koponsolon manamong sandad posorili nogi’ momogompi’ kinoubasanan om koubasanan Tamparuli i kosili kointutunan watas dilo’.
“Baang mositi’ kakal oburisi om amu’ oyomutan. Koubasanan om kinoubasanan nga’ nuru’ do gompion mooi do sukod wagu karati kointutunan diolo’,” ka disio.
Tukod tohuri, ka disio, nopo nga’ kopoindalanan om kogompitan rayat maya’ ponuridongan Kounsol Monontuduk Komuniti Tamparuli.
“Tikid apat wulan, rumuba’ oku do lansanon mogigiyon, molohingon kampung, JPKK om koisaan montok mokianu pomusarahan nogi’ manalasai kobolingkahangan kinoiyonon. Koburuon bobos osonong koimbulai mantad rolou rayat,” ka disio.
