Dr. Joachim (poindikau kotolu, wanan) guminambar pongingitanan miampai oinsanan nokotindapou id ramai kinopoimaganan SLAF 2025.
KOTA KINABALU: Pomorunan landskap kikosiwatan agayo montok kosili mongunguhup wagu kumaa nindopuan pogun Sabah maya’ kopoindalanan projik koburuon kiwaya’ akawas i pointutunan id Palan Malaysia ko-13 (RMK13), ka di Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Minoboros siio, komontirian dau nokopoulud no pipiro projik landskap agayo id watas rubpuon ikonomi kaampai Putatan, Kuala Penyu, Sandakan om Kudat montok popogoris kinolumison, kasasanangan nogi’ kokiikitanai watas longkod pongindopuan agayo (CDB) id pogun diti.
“Projik ngaawi’ diti kosili posunduran kumaa kopoingkawasan kokitanan kakadayan, suai ko’ monginggirot ginoris surupukaraja landskap id siriba’ boogian kikuasa nokoiyonon. Kopiongoi ilo’ di sondikoton koporintaan pogun monotk mongimbulai koyuon pososorili’ poinggompi’, olumis om ‘osuau’ mogigiyon,” ka disio ontok pinopoimagon Sabah Landscape Architecture Festival (SLAF) 2025 id Longkod Konvensyen Sompomogunan Sabah (SICC), do hiti id konihab.
Dr. Joachim (kotolu, wanan) guminambar miampai di Dr. Jamili (kotolu, gibang) ngoi’ tombului naalap di nokotindapou.
Dr. Joachim minoboros, SLAF nopo nga’ oponsol nogi’ kosili impohon oponsol montok popokito kosiwatan agayo siktor landskap sabaagi iso’ pomorunan kigatang pomoruhang i okon nopo ko’ monginlumis koiyonon kakadayan, nga nogi’ kouhup kumaa ikonomi pogun maya’ koburuon taman ginumuan, koiyonon otomou om ponombuluyan.
Ka disio, landskap okon nodi ko’ nuru’ intangan sabaagi ponginggonop toi komponen tohuri id koburuon, nga nosili impohon id pamalanan kakadayan, pomuwalaian, ponombuluyan om panamangan intodonon sandad.
“Ponginsomokan diti kaanu mongimbulai piadangan id pialatan koburuon fizikal om kopomogompian sandad posorili’, potilombus dilo’ monokodung angkab Sabah Maju Jaya,” ka disio.
Pinosotol nogi’ disio o kogompitan abaal id seni bina landskap oponsol kopio montok papatantu’ tikid projik koburuon momoduli’ eikologi om koumoligan, lolobi no katalib kinaantakan tana’ nopiang i naantakan di kaawagu diti.
“Landskap kitonggungan sabaagi pongumolig poinsandad om kakamot ‘mitigasi risiko’ kadaat, kohondot dilo’ mositi’ ilo’ onuan koiyonon osuul id kapamansaian koburuon,” ka disio pinoposotol.
Dr. Joachim (kotolu, gibang) minamaramit tandamato mantad di Dr. Jamili.
Dr. Joachim minoboros, komontirian maya’ ‘Dasar Landskap’ Pogun Sabah 2021-2033 tumilombus monginggirot inggisaman koburuon otomou om pomogompian sandad monuridong pososorili’ di oulud nogi’ kopotonggoi toinsanan montok rayat.
Minoboros isio, pongonjuran SLAF 2025 nosili iso’ pananda rontob kumaa naangayan pomorunan landskap pogun om maan paralado’ sabaagi ababayan toun-toun i kopohompit kotonudan bohogian kikuasa’ nokoiyonon, pomorunan nogi’ mogigiyon.
“Maya’ ababayan miagal diti, kapangakun tokou kouhupan papamanau pomorunan nokoiyonon i kikosiwatan agayo popouhup kumaa ikonomi om koburuon pogun,” ka disio i pinopoilo nogi’ do Sabah Landscape Architecture Awards pointutunan do toun tiso’.
Pinointalang nogi disio do SLAF diti baino’ kapanau solinaid limo tadau nung piadangon sangadau di toun nakatalib, kopuli do seminar sompomogunan, pokikitanan nogi’ kaparagatan mogigiyon id Taman Ginumuan Teluk Likas.
Wookon tingkananon kopio seminar toun diti nopo nga’ piilangan abaal nokoiyonon om sompomogunan kokomoi “Nature Based Solution”, ilo’ nopo nga’ ponginsomokan koburuon mimpau kopomogompian sandad posorili’.
“Kalansanan ku pongonjuran SLAF 2025 kosili koiyonon piilangan toilaan om pomusarahan wagu i kopogowit Sabah kumaa koburuon landskap di lobi ‘lestari’, ‘kreatif’ om kiwaya’ akawas,” ka disio.
Nokotindapou nogi’ Monunurat Pointatap Komontirian, Datuk Dr. Jamili Nais; tongo’ Kumoduo Monunurat Pointatap I & II, Tpr Stanley Chong om Faridah Giau; Monunurat Pointatap Komontirian Ponombuluyan, Koubasanan om Sandad Posorili’, Datuk Josie Lai; Kumoduo Potunud Sektoral 1, Unit Mamalan Ikonomi Pogun (UPEN) Sabah Datuk Robert Stidi; Luguan Monguhup Monunurat Siktor Landskap om Kelestarian po nogi’ manganganjur SLAF 2025, Lar. Nurulhayati Awang More om manganganjur miuhup, Upisor Eksekutif Kounsol Kakadayan Putatan, Ahmad Helmy Mohd. Taib.
