Nizam Abu Bakar Titingan
KOTA KINABALU: Naangayan Gabungan Rakyat Sabah (GRS) id siriba’ kopomuruanan di Boyoon Montiri, Datuk Seri Haji Hajiji Haji Noor kopokito do Parti Warisan no i otopot no do “papadagang tubat”, ka di Luguan Kopointalangan Parti Gagasan Rakyat Sabah (Gagasan Rakyat), Datuk Nizam Abu Bakar Titingan.
Minoboros isio, kointalangan di Presiden Warisan Datuk Seri Shafie Apdal i minonondos di Hajiij “papadangan tubat” pongumbalan nopo do papawaliu pongingintong rayat mantad amu’ kinalantaion pomorintaan Warisan di maso momorinta’ Sabah – iso’ i kakal otomou id pomuhondoman rayat.
“Shafie kaanu momoros nunu nopo, nga’ rayat koilo isai i papadagang batos aiso’ suang om isai i kumaraja’ do amu’ mingkomi minogowit asil kumaa Sabah,” ka disio id kointalangan di tadau baino’.
Ka di Nizam, Palan Koburuon Sondikoton Sabah Maju Jaya (SMJ) okon i ko’ slogan tomod di aiso’ suang miagal di umbalan do popokito, nga’ palan koburuon i nokopokito asil atalang id timpu oruhai.
“Id siriba’ kopomuruanan di Hajiji, asil pogun Sabah nokosigampot somok RM7 bilion di toun 2024, asil mantad kinosimbanon ‘fiskal’ om pomorintaan wagu i nakapatantu’ kousinan pogun noulud miampai osonong. Id timpu miagal, kopoopuan kigatang RM11.7 bilion nga’ nokosurat montok timpu wulan Koiso’ gisom Koonom 2025,” ka disio.
Karait kobolingkahangan pangaba’ waig i sasaru’ silihon modal pulitik do Warisan, pinointalang di Nizam do koporintaan GRS noondo masaan popoindalan 18 projik kogogonopan waig id pototongkop ogun, kaampai Projik Wokok Waig Tawau, Loji Pongubatan Waig (LRA) Kogopon 2 id Papar, nogi’ Projik Monginsonong ‘Muka Sauk Kabang’ i pikikiro opongo do toun tiso’.
“Oinsanan diti nopo nga’ wookon mantad palan timpu anaru do papatantu’ koromutan waig oborisi’ di po’ompus kumaa rayat sabah, okon ko’ batos ‘sontoun asalasai’ miagal i noumbalan pinoboros do Warisan. Inggisaman diti nga’ kopohompit nogi’ pamansaian wokok wagu, kapamaraladan loji di haro mantad om monginsonong sistem kopoikidan waig i amu’ nopoduli’ hinapadan toun,” ka disio pinopointalang.
Minoboros nogi’ isio do kopoindalanan palan SMJ nga’ nokopokito pinonginsonongan om pinamansaian kawagu ralan labus kakadayan, mongukab piromutan kumaa watas poonsokid nogi’ minonginsikap koburuon ikonomi id labus kakadayan.
Id siriba’ palan miagal, koporintaan minomongo lobi 7,000 unit Walai Mesra Rakyat montok rayat Sabah om pinaparalad Skim Ponguhupan Tunai SMJ i nokouhup minonginggan tonggungan rayat kinindopuan osiriba’.
“Koinsanai diti mantad no do karaja’ ogoris koporintaan pogun i buruanon di Datuk Seri Hajiji,” ka disio i pinoposorou do di maso Warisan momorinta’, kopoopuan agayo pinahabar nopo id karatas, kokusutan waig mala’-dala’ om ogumu’ projik rayat i noundarangan sundung do duo nogi’ toun minomorinta’.
“GRS okon i ko’ papadagang tubat. GRS masaan momolingos waya’ mantad pomorintaan laid di amu’ nakalantoi,” ka di Nizam pinoposotol.
“Id siriba’ kopomuruanan di Hajiji di oulud om haro prinsip, Sabah gumura’ mimpau kointalangan om asil, okon ko’ pagkakaa. Rayat amu’ nodi mimang do ‘sandiwara’ pulitik laid. Mimang yolo’ do koporintaan di kumaraja’, okon ko’ mimpamatos,” ka disio.
