KOTA KINABALU: Gabungan Rakyat Sabah (GRS) pinoposotol oinsanan parti komponen nuru’ tumilombus misompuru om momoguno iso’ ‘lambang’ id koponoguangan Pomilian Agayo Pogun ko-17 (PRN17) Sabah toun diti.
Kinoposotolan dilo’ winonsoi id Mitingan Kounsol Presiden GRS i pinonorikohon di Ponorikohon dilo’, Datuk Seri Haji Hajiji Haji Noor di konihab miampai oinsanan presiden parti komponen nogi’ Monunurat Agayo, Datuk Seri Masidi Manjun.
Mitingan kilinaid somok duo jaam dilo’ miniboros di posodia’an kopoguraan karaja’ PRN17, kaampai pirundingan kopoikidan timpohon miampai Pakatan Harapan (PH).
Poingkuro po, Presiden Parti Solidariti Tanah Airku (STAR), Datuk Seri Dr. Jeffrey Kitingan om Presiden Parti Maju Sabah (SAPP), Datuk Seri Yong Teck Lee pinopolombus angkab montok momoguno lambang parti sopipoopori id PRN do dumontol.
Kootusan dilo’ miampai mitilombus kopongukab kopikiikiraan STAR om SAPP popo’iliu calun id timpohon i ponongkialaan calun PH.
“Mitingan pinapatantu’ do nombo-nombo parti komponen i momili’ do popo’iliu calun momoguno lambang parti sompoopori komoyon do luminabus mantad GRS. Mantad dilo’, calun ngaawi’ mantad parti dilo’ amu’ nodii mongobi’ do GRS id PRN17,” ka di Masidi id kointalangan di tadau baino’.
Minoboros isio, i Hajiji id mitingan dilo’ pinoposorou nogi’ do oinsanan komponen mositi’ mamantang piniokunan piuhupan i pinahabar miampai PH pogulu diti.
“Mimpau prinsip piisaan, GRS nuru’ mamanau sabaagi iso’ tinan miampai oinsanan calun momoguno lambang GRS,” ka di Masidi pinopointalang.
Miampai kootusan dilo’, kosompuruan STAR om SAPP id GRS miampai poinpoopori nopupusan.
Ka di Masidi, Presiden Gagasan Rakyat Sabah (Gagasan Rakyat), Parti Bersatu Sabah (PBS), Kotinanan Kabansaan Sabah Misompuru (USNO), Parti Liberal Demokratik (LDP), Parti Harapan Rakyat Sabah (PHRS) om Parti Cinta Sabah (PCS) mamantang kootusan STAR om SAPP tumanding mimpoopori.
Ka disio, Presiden STAR om SAPP nga’ mamantang nogi’ ningkakaton parti suai i minomili’ montok tumimporon miampai GRS nogi’ monilombus piuhupan kohunung miampai PH.
“Mitingan nakapanau id koyuon di osuau, otiu’ ginawo om pointalang. Oinsanan lansanon tumumboyo’ di kootusan i winonsoi maya’ pinibabarasan om mmamaramit pisuayan pomusarahan id sunduan demokrasi di nosukod.
“GRS tumilombus papagaras kapapanahan karaja’ om monginggirot kararalano’ montok monoguang PRN17 miamapi tonggungan poinponu’ kumaa kaadangon om kasasanangan pogun Sabah,” ka disio.
