Dr. Joachim (poungkakat koonom, gibang) guminambar miampai oinsanan nokotindapou id kinopoimaganan jambatan gantung Kg. Turuntungon.
KUNDASANG: Kumoduo Boyoon Montiri po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minoboros, kinoinsawaton asil nopuhu pogun nakapasaga’ lobi kogumu’ prouik koburuon do koindalan, suai ko’ mogisusuai inggisaman ponguhupan patahakon kumaa rayat.
Minoboros isio dilo’ ontok tuminindapou ababayan ‘turun padang’ id Lintuhun Mini Kg. Pinausok do hiti, konihab.
Dr. Joachim minomutul ribon pinopoimagon kinopoimaganan jambatan gantung Kg. Turuntungon.
Id ababayan dilo’, Dr. Joachim pinapatahak pason om pinopointalang mogisusuai inggisaman koporintaan kaampai kobuuron id koiyonon dilo’. Ka disio, ponginsomokan miagal diti kapanahak kosiwatan kumaa mogigiyon, kaampai sukod wagu, do mikorumo miampai disio.
“Ababayan diti nga’ kituduan nogi’ popointalang palan koporintaan, kaampai inggisaman popomogot rontob kogogonopan id koiyonon diti,” ka disio i minonongkounsikou mantad sokodung ouli’ mogigiyon Pinausok.
Dr. Joachim (kotolu, gibang) pinapatahak toluod kanopi kuminaa mongingindapu’ Kampung Perancnagan.
Pinosotol disio, sokodung dilo’ sulian maya’ kopoindalanan mogisusuai projik koburuon id kampung nokomoi. Wookon sisimbar di naramit mantad mogigiyon nopo nga’ upalai koburuon kogogonopan sosiol om koponginsonongan ralan kampung.
“Kohondot dilo’ sokodung po’ompus rayat kumaa koporintaan poinharo mantad oponsol kopio montok papatantu’ koinsanai palan aanu tilombuson,” ka di Dr. Joachim po nogi’ Montiri Koporintaan Koiyonon om Pomuwalaian.
Dr. Joachim minokinongou kinopointalangan mantad songulun mogigiyon Kampung Pinausok.
Id ababayan sopisuai, kuminakap nogi’ isio id Kg. Perancangan om Kg. Turuntungon. Wookon pinoindalan do hilo’ kaampai kinapatahakan duo kanopi kumaa mongingindapu’ id Kg. Perancangan, kinapatahakan kinotuan mantad tana’ tidong Kundasang, nogi’ kinopoimaganan jambatan id Kg. Turuntungon.
Daamot dilo’, nolim di Dr. Joachim totondos bohogian atantu’ i pinopikawit disio do minamaramit susuap.
Dr. Joachim monongkirumo miampai mogigiyon Kampung Pinausok.
“Totondos dilo’ amu’ kopio otopot. Logoson o SPRM popoindalan ponoriukan, om nung haro boogian i tumilombus mimponondos, amu’ oku bakangon maganu laang undang-undang,” ka disio pinoposotol.
Nokotindapou nogi’, Monunurat Pulitik kumaa di Dr. Joachim, Yubidi Gumpoyo; Luguan Watas DUN Kundasang, OKK Dominic Ghanie; Luguan Komulakan PBS DUN Kundasang po nogi’ Monunurat Piromutan Ginumuan Kumoduo Boyoon Montiri, Khairul Kalimin; Luguan Koonduan PBS i po nogi’ Luguan Mamasok Pogun (KAN) DUN Kundasang, Aini Tampig; tongo’ mongobi’ Luguan Mamasok Pogun (WKAN), lansanon nokoiyonon om sitaf Unit Lansanon om Koburuon Mogigiyon (UPPM) DUN Kundasang.
