Dr. Joachim (kotolu, wanan) minokinongou kopointalangan mantad di Rudi ontok minooi intong Asrama Cahaya Kasih dilo’.
RANAU: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minindahu’ minooi intong Asrama Cahaya Kasih i kakal amu’ nopongo kopio doid Kampung Malinsau Darat, do hiti.
Kinotombuluyan dilo’ montok minintong kinomogoton projik asrama mogigiyon dilo’ om mongintutun koyuon toluod i aanu patahakon do koporintaan toi Upis ADUN Kundasang.
“Intangan tokou nunu i nuru’ pouhupon, i potuu mnatad koporintaan toi kosuul no maya’ Upis ADUN Kundasang. Maan tokou nogi’ nondo pogibabarasai nunu po ponguhupan i aanu patahakon kumaa diolo’,” ka disio soira’ rinubaan media do hiti di kaawagu diti.
Asrama i kopo’iyon kikiro 20 susumikul id tisoiso’ timpu dilo’ winaal momoguno kousinan mantad mogisusuai kotinanan okon koporintaan (NGO) kaampai no Kounsol Gereja-Gereja Sabah.
Inggisaman dilo’ pinapanau do mogigiyon Kampung Malinsau Darat miampai Sikul Kabansaan (SK) Sri Gabungan montok monguhup susumikul i poingiyon osodu’ do monilombus sinikulan.
Projik kigatang kikiro RM230,000 dilo’ nakaramit ngoi’ do ponguhupan tana’ i pinoobi’ di mogigiyon nokoiyonon i opoduli’ di koinggoritan molohing papaatod tanak diolo’ mooi sikul tu’ kinoiyonon di osodu’.
Ponorikohon projik, Rudi Burain i po nogi’ Molohingon Mongingia’ SK Sri Gabungan, monongkounsikou mantad kinasagaan di Dr. Joachim kuminakap om minooi intong sondiri’ kogugunaan asrama dilo’ montok monginsikap kopongohan dilo’.
“Yahai id mogigiyon diti oupakat monuridong asrama miampai ponguhupan NGO, kosuul no gereja ngaawi id pototongkop Sabah. Gisom noondo, kinomogoton pamawaalan nokosigampot no do 90 pihatus, nga’ kakal haro pipiro kakamot i nuru’ posodiaon pgoulu oukaban ilo’.
“Miampai ponguhupan di Datuk Seri Dr. Joachim, otumbayaan yahai asrama diti oguno id timpu toruhai. Susumikul do hiti okon nopo ko’ kaanu kogogonopan iyonon, nga mogisusuai kaparagatan akademik om ‘kerohanian’ maan poindalano’,” ka disio.
Nokotindapou nogi’ id kinotombuluyan dilo’ i Monunurat Pulitik di Dr. Joachim, Yubidi Gompoyo; Ponorikohon JPKK Kampung Nasakot Malinsau Darat, Patrick Gundalam nogi’ pipiro lansanon nokoiyonon.
