Dr. Joachim (poindikau kaapat, gibang) guminambar miampai mogigiyon Kampung Tinongian.
RANAU: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minokianu rayat, kosuul no mogigiyon id watas DUN Kundasang, do misompuru om manahak sokodung ouli’ kumaa Gabungan Rakyat Sabah (GRS) id Pomilian Agayo Pogun (PRN) obontol.
“Kanou tokou no misompuru. Iti no hontolon kopio dati’ minonuridong Gabungan Rakyat Sabah, iso’ piomungan parti nokoiyonon i osombulu’. Id timpu miagal, yati’ nga’ tumilombus misokodung miampai koporintaan Pisompuruan.
“Mositi’ tokou papatantu’ kalantaion GRS tu’ piomungan diti kiharo rikod bobos osonong id pomorintaan. GRS nokoponuridong koporintaan di ogirot nogi’ tumopot doid kopoburuan Sabah,” ka disio ontok minoboros id Ramai Lansanon Miampai Rayat id Balairaya Kampung Tinongian do hiti, konihab (17tw Kotolu).
Dr. Joachim (gibang) guminambar miampai dilo nakaampai id kinotombuluyan doid Gereja SIB Kg. Kepuakan.
Ababayan diti kituduan montok mokinongou komi nogi’ kobolingkahangan i potoguang mogigiyon kampung. Ababayan dilo’ notindapou kiikiro 200 tulun om nokopokito nogi’ do piniuhatan simbar id pialatan lansanon om rayat.
Daamot dilo’, Molohingon Kampung Tinongian, Timbalun Natoh minongobi’ mogigiyon kampung, pinopolombus kopongunsikohan kuminaa di Dr. Joachim mantad kinasagaan disio pinoposiwat timpu tuminindapou.
Dr. Joachim (koduo, gibang) minokinongou kopointalangan mantad di Ratimin (wanan) ontok minooi intong koiyonon gelanggang poingukab SK Karagasan.
“Kosiwatan rumuba’ do rayat diti kopokito tonggungan akawas di Dr. Joachim kumaa mogigiyon, sundung disio kiharo timpu karaja’ di opidot,” ka disio.
Nokopogulu, Dr. Joachim miampai momumuruan nokoiyonon minooi intong koiyonon ponuridongan gelanggang poingukab montok Sikul Kabansaan Karagasan nogi’ minooi intong ponuridongan lintuhun okoro’ i kogunaan do mogigiyon kampung.
Talib dilo’, Dr. Joachim pinopoimagon nogi’ Balairaya Kampung Kepuakan di wagu om minooi intong Gereja SIB Kepuakan, i momoguno karaja’ kopongundaran.
Dr. Joachim minonuntung tagung ponokotanda’ gimik kinopoimaganan balairaya wagu Kg. Kepuakan.
Minonongkounsikou nogi’ isio kumaa tinan okon koporintaan (NGO) nogi’ minsosongulun i opuahang pinapatahak ponguhupan kumaa diolo’ i momoguno.
Nokotindapou nogi’ i ababayan dilo’ i Monunurat Pulitik kumaa di Dr. Joachim, Yubidi Gompoyo; Monunurat Olisok, Japli Sami; Lansanon Koburuon Mogigiyon DUN Kundasang, Dounis Sani; Luguan Watas DUN Kundasang, OKK Dominic Ghanie; Popoburu’ Mukim, Ratimin Kukunot; Monguhup Upisor Balajaran Watas Ranau, Jaminus Agang; Molohingon Kampung Kepuakan, Thomas Tanburud; om i Ponorikohon JKKK Tanjunin Galumbu nogi’ Puru Lintuhun Komulakan Sabah (ADBS) DUN Kundasang, Salbinus Tangkiris.
