Kadzim M. Yahya ontok kapahabaran doid DUN Sabah id Kota Kinabalu di tadau baino’.
KOTA KINABALU: Kootuson karait timpohon Lintuhun Undangan Pogun (DUN) Melalap oilaan nopo om katalib timpu 14 tadau.
Tumanud Utusan Malaysia, Speaker DUN Sabah, Datuk Seri Kadzim M. Yahya minoboros, ningkakaton di Datuk Peter Anthony sabaagi Puru Lintuhun Undangna Pogun (ADUN) Melalap potontuon katalib oinsanan kopoobian undang-undang di poinggompit otumboyo’ ngaawi’.
Ka disio, miampai teknikal dau timpohon DUN Melalap iduanan nga’, ADUN Melalap kakal kiharo kosiwatan montok laang undang-undang potilombus dilo’.
Nga’, nung aiso’ laang undang-undang i pofoilon id suang timpu 14 tadau dilo’ nga’ timpohon DUN Melalap oiduanan miampai ‘otomatik’ (mimpopori) tu’ natagakan i Peter kosudongan sabaagi songulun ADUN.
“Tumanud Perkara 17(1)(e) id siriba’ Koundangan Pogun Sabah, nombo-nombo Puru Lintuhun Undangan i pogompiton mantad kasalaan do kuut id Pisompuruan om ukumon jiil amontok amu’ oruhai mantad sontoun toi danda soginumu’ amu’ okuri’ RM2,000, atagakan kosudongan sabaagi songulun Puru Lintuhun Undangan Pogun.
“Nga’, kopoobian dilo’ nuru’ do basaon mitonggoi di tongo’ pinoobi’ suai id siriba’ Koundangan Pogun Sabah i kopohompit do katagakon kosudongan songulun Puru Lintuhun Undangan,” ka disio id kapahabaran doid Pisuk Rafflesia DUN, do hiti di tadau baino’.
Nuhot karait kogunoon papaharo Pomilian Agayo Okoro’ (PRK), ka id Kadzim, sabab no do timpu Pomilian Agayo Pogun (PRN) noolu’ po pipiro wulan nga’ aiso’ kogunoon montok papaharo PRK.
Ka disio, PRK amu’ maan pohoroo’ nung kokusungan timpohon aantakan id suang timpu oruhai ko’ mantad duo toun.
Suai ko’ timpohon DUN Melalap i iduanan, timpohon DUN Sungai Sibuga nga’ iduanan soira’ di mongingigit dilo’ Datuk Mohamad Hamsan Awang Supain nokoidu’ pogun di ko 20tw Koiso’ katatalib.
Peter po nogi’ bagas Montiri Koburuon Infrastruktur Sabah hinukum jiil minimpuun di konihab soira’ Kuut Pokinsianan minonimporon kootuson i winonsoi do Kuut Sesyen di ko 26tw Kolimo 2022.
Pogulu diti, pinootungan isio ukuman jiil tolu toun om danda RM50,000 mantad totondos minomudali’ dokumen kohondot kuntirik koponginsonongan Sistem Mekanikal om Elektrikal (M&E) id Univositi Malaysia Sabah (UMS) di 11 toun nakatalib. Peter minambayar danda dilo’.
Nakalantoi isio timpohon DUN Melalap id PRN 2020 id tikit Parti Warisan (Warisan) pogulu disio luminabus mantad Warisan di ko 28tw Kohopod om Duo 2021.
Talib dilo’, minonuridong isio Parti Kesejahteraan Demokratik Masyarakat (KDM) di wulan Koduo 2022.
