Tun Musa (tanga’) minamaramit tandamato mantad di Mohd Sofi.
KOTA KINABALU: Montok mongingkawas rontob panamangan koumoligan id piwolitan pomogunan, do pos imbangan susumangod id Sabah ilo’ nopo nga’ Tambulanan om Ladang Brantian pikikiro opongo toun diti.
Panglima Medan Timur Susumangod Tindal, Leftenan Jeneral Datuk Mohd Sofi Md Lepi minoboros haro pipiro projik koburuon infrastruktur koumoligan masaan poindalanon id Sarawak om Sabah kopohompit ponuridongan wagu toi monginsonong rontob tongo’ pos ngaawi’ di haro mantad.
“Haro nogi’ apat pos koumoligan id Pulou Sebatik i pinolulus do Kounsol Koumoligan Pogun (MKN) miampai piuhupan Susumangod Tindal Malaysia (TDM) om Komontirian Koumoligan miampai iso’ pos maan patahako’ kumaa TDM montok mindikau pos dilo’ ilo’ nopo nga’id Sungai Kuning, Pulou Sebatik.
“Di toun nakatalib, Pos Mentadak Felda Selatan id Kalabakan naanu minomongo om tilombuson nogi’ dahai do papagaras di tongo’ pos ngaawi’ i poinharo mantad mooi do puru dahai kaanu kumaraja’ miampai lobi osimbayan om manahak kopomodlianan kumaa karaja’ ngaawi’ i kiguno poindalanon doid koiyonon piwoligan,” ka disio katalib kinotombuluyan apantang kuminaa di Molohingon Agayo Pogun, Tun Musa Aman, di tadau Koduo.
Kinotombuluyan dilo’ kituduan popointutun kopomuruanan akawas TDM id Sabah kumaa di Tun Musa suai ko’ popoilo kinoburuon koumoligan kosuul no ponuridongan pipiro pos koumoligan wagu id posolinsig tisan rahat om Pulou Sebatik.
Mohd Sofi i tinanud do sinawaan, Datin Erni Irawati Rosli nga’ pinopoilo nogi’ do TDM maa’ ponguludan karaja’ Pomorintaan Medan Timur Susumangod Tindal (PMTTD) toririmo poinsosodia’ monguhup mogigiyon i nawayaán do Monsun Timur Laut i naantakan do noondo diti.
“Alhamdulillah, nakaanu yahai minongulud om miniuhup miampai kotinanan ngaawi’ bohogian kikuasa’ koporintaan suai maya’ Puruankuasa’ Ponguludan Kadaaton,” ka disio ontok rinubaan media id Istana Seri Kinabalu.
Nokotindapou nogi’ id kinotombuluyan dilo’, Panglima 5 Divisyen, Mejar Jeneral Datuk Noorrul Azril Ariffin, Panglima 5 Briged, Brigedier Jeneral Datuk Mohd Zamri Abdullah om i Panglima 13 Briged, Brigedier Jeneral Jagjit Singh A/L Indar Singh miampai sinowoon diolo’ sompoopori.-Penerangan
