Dr. Joachim Gunsalam
KOTA KINABALU: Koporintaan opoduli’ kopio om minonuluk batos montok manahak kopoiyanan kumaa tongo’ mongingiyon ‘Rumah Pangsa Tanjung Aru’ (RPTA) i noumpadanan.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, oinsanan mongingiyon i kosudong nopouyuhan walai Ababayan Pomuwalaian Rayat (PPR).
Ka disio, kogumuan mongingiyon RPTA nga’ minanahak sokodung montok mundaliu tu’ karati di koyuon om tuduan kopio do koporintaan.
“Wookon mongingiyon sumurilog amu’ mongiduan RPTA tu’ nakaramit kointalangan di amu’ kohunung di bohogian ngaawi’ aiso’ tinonggungan.
“Kotinanan Kopotundaan Pomuwalaian om Kakadayan (LPPB) pinapalabus Notis Koponsunudan linimput RPTA nopo nga’ amu’ oumolig do iyonon di wulan Kolimo 2021, nopo kopoilaan osopung montok di tongo’ mongingiyon sumoosodia’ mogihum koiyonon di suai sundung pia do aiso’ tadau koompokon koponongkiadan di pinatantu’.
“Kootuson mongiduan linimput RPTA nopo nga’ mantad no linimput i kilinaid lobi 50 toun dilo’ adalaan nodi kalaid om maag-raag nogi’ amu’ nodi oumolig, naamot kos koponginsonongan om kopongundaran kapagawi’ balanja’ di lobi kagayo ko’ mantad bayaran siwa’.
“Koduo nopo, haro mongingiyon i aiso’ tonggungan amu’ mambayar siwa’, hinombo ‘tunggakan’ RPTA gisom wulan Kohopod om Duo 2024 nopo soginumu’ RM236,585 nokoowit do bohogian LPPB kotilombus kotoguang korugion,” ka disio pinopointalang id kointalangan di tadau baino’.
Dr. Joachim minoboros, Notis Kopongiduanan pinalabus kitadau 12tw Koonom 2024 pinapatantu’ tadau koompokon kopongiduanan walai/kadai RPA do ko 31tw Kowalu’ 2024 katalib tolu toun, minanahak timpu tolu wulan hinombo do minaan nogi’ pouruto’ kumaa tadau 30tw Kosiam 2024.
“Gisom tadau baino’ diti, mongingiyon nonuan koluhawon montok mundaliu id timpu suti’ penggal sinikulan do babaino’.
“LPPB minananud ponuhuan do koporintaan miagal di pinointalang di bagas Montiri Koporintaan Koiyonon om Pomuwalaian om minanahak koposuulan kumaa tongo’ mongingiyon RPTA do pouyuhan PPR LPPB hinombo diolo’ i kosudong nonuan kopouyuhan walai soira’ nopo haro kokusungan, om sundung haro i minagada’ tu’ mokianu koiyonon di kosudong montok diolo’, nonuan nogi’ kosiwatan kumoinduo om koposuulan montok pouyuhan walai soira’ haro kokusungan id kinoiyonon pinili’.”
Dr. Joachim minoboros, bohogian LPPB nga’ mininggisom nogi’ maganu ponguhupan mantad pipiro bohogian kikuasa’ nokoiyonon montok poposodia’ walai PPR suai.
“Mongingiyon sondiri’ i magada’ di tongo’ kopouyuhan walai LPPB, mantad dilo’ LPPB aiso’ pili’ di suai nga’ minokianu diolo’ mundaliu kumaa walai noihum sondiri’.
“Walai PPR LPPB miagal nogi’ RPTA nopo potingkananon montok tinimungan kinindopuan osiriba’ hinombo do wookon katatapan montok kosudong moniwa’ PPR tumanud Katatapan Kopoobian Walai Kos Osiriba’ Montok Posiwaan Pogun Sabah 2018 nopo: gaji amu’ katalib RM3,000 om aiso’ walai sondiri’, naamot mongingiyon i okon ko’ moniniwa’ mantad nopo nga’ amu’ kosudong.
“Mantad no dilo’, montok diolo’ i amu’ koponumboyo’ katatapan dilo’ kiguno do mongiduan walai miagal id koyuon tomod sabab no do amu’ kosudong.
“Iso’ kawagu katatapan montok tumilombus moniwa’ nopo nga’ aiso’ tungganak siwa’, nga’ mongingiyon RPTA nonuan koluhawan om kakal pinouyuhan walai sundung pia kitunggakan.”
Dr. Joachim minoboros, walai siwa’ ngaawi’ PPR LPPB okon i ko’ walai wagu om sundung id Pibatosan Poniwaan Walai, moniniwa’ kibatos manamong walai miampai osonong, nga’ kogumuan walai di pinoguli’ sasaru’ id koyuon di araag hinombo moniniwa’ i aiso’ tinonggungan popologos kinaraagon di nadalaan om kopohompit kos kopongundaran rinibuan ringgit nung piadangon di deposit i kiginumu’ no do RM240.
“LPPB tantu’ nopo momonsoi ponginsonongan om papatantu’ walai aanu iyonon nga’ mimang nopo do amu’ kaanu poposili walai miagal do walai wagu pogulu posiwaan kawagu miagal di iman-imanon do moniniwa’ wagu. Koduo nopo rontob siwa nopo nga’ omurah ilo’ nopo nga’ RM124/RM150/RM170 sombulan.”
Poingkuro po, koyuon walai noilaan do padaahan tomod nopo tu’ haro nogi’ mongingiyon RPTA i nakaramit walai, miagal do id PPR Kibabaig, hinombo walai kakal wagu, pia gisom noondo amu’ po minundaliu luminabus mantad RPTA.
“Bohogian dahai karati do (ADUN Tanjung Aru) Datuk Junz Wong opoduli’ kopio di koyuon om kobolingkahangan potoguang do tongo’ mongingiyon RPTA, mantad dilo’ komontirian ku minokianu kouhupan mantad di Datuk Junz om monguhup koporintaan do manalasai kobolingkahangan diti miampai maganu walai sumpili’ kumaa tongo’ moniniwa’ RPTA diti om mamason diolo’ do koumoligan diolo’ nopo nga’ oponsol kopio om mantad no dilo’ do nuru’ mundaliu osisikap montok mongilag haal ngaawi’ di amu’ kasagaan do aantakan tu’ tadau misimban tadau koyuon RPTA amu’ nodi poinjamin.
“Bohogian Komontirian Koporintaan Koiyonon om Pomuwalaian amu’ oputut-putut do monguhup moniniwa’ ngaawi’ i kosudong montok kaanu PPR okon nopo ko’ id siriba’ LPPB nga nogi’ id siriba’ DBKK om susuai PBT.
“Mantad dilo’, kalansanan kopio mooi do tongo’ mongingiyon RPTA manahak sokodung kumaa bohogian LPPB montok mongiduan om papatahak kawagu walai miampai osonong, oulud om poingukab ginawo do osisikap,” ka disio.
