Hajiji miampai tombului kingaangaran di suai id Ramai Sayau Naga, Mondou om Unicorn Toun Wagu Sina nogi’ Pokikitanan Kampung Koubasanan 2025 id Longkod Konvensyen Sompomogunan (SICC) do hiti di tadau baino’.
KOTA KINABALU: Koporintaan Pogun tumilombus papatantu’ pisompuruan om piuludan rayat mogisuai tinaru id Sabah toririmo poinggompi’, potilombus dino amu’ mimang haro tongo’ koyuyuon labus mantad soborong rumikot montok mamawanit pomusarahan om koubasanan rayat pogun diti, ka di Boyoon Montiri Datuk Seri Haji Hajiji Haji Noor, pinoposotol.
Minoboros isio, rayat Sabah i kiharo lobi 30 tinaru poinpasi id koyuon oulud solinaid diti sundung pia sopisuai ugama’ om tinaru.
“Nga’, kolumison dati’ nopo, maya’ do koubasanan potilombus tokou misompuru om iti kiguno posunion montok sakag dumontol. Mantad dilo’, amu’ oku mimang tongo’ koyuyuon mantad soborong kumaa pogun diti montok mamawanit pomusarahan rayat Sabah.
“Mamantang tokou koubasanan oinsanan tinaru ilo’ pogi’ koporintaan pogun nga’ papaanjur nogi’ tongo’ kararamaian agayo id pogun diti miagal Tadau Agayo Aidilfitri om Toun Wagu Sina’ id nayatan pogun,” ka disio ontok pinopoimagon Ramai Sayau Naga, Mondou om Unicorn Toun Wagu Sina’ nogi’ Pokikitanan Kampung Koubasanan 2025 id Longkod Konvensyen Sompomogunan Sabah (SICC) do hiti, di tadau baino’.
Boyoon Montiri minoboros, iti no kinolumison pogun Sabah tu’ nunu nopo kararamaian di poonjuron, kaanu ilo’ raramit osonong mantad rayat orukut tinaru.
“Sabab dilo’, mamagatang oku kopio kinapagalapan kumaa ramai diti om bayahan kumaa manganganjur ilo’ nopo nga’ Koisaan Mogigiyon Sina’ Sabah Misompuru Kota Kinabalu (USCCAKK).
“Mositi’ tokou manamong kararamaian miagal diti montok tangaanak tokou tu’ miampai kopogisusuaian diti no do kopoinggirot po piuludan id Sabah,” ka disio.
Hajiji minoboros, koporintaan pogun papatanu’ oinsanan koubasanan om kararamaian pantangon kaampai manahak kopoobian kousinan kumaa rayat id pogun diti.
“Inggisaman nopo diti nga’ kointalangan do koporintaan pogun mamagatang kapamaramaian koinsanai karamaian di haro id pogun diti, kaampai Toun Wagu Sina,” ka disio.
Boyoon Montiri pinopolombus nogi’ koondosan di kinopongonjuran ramai dilo’ i okon nopo ko’ ramaion do mogigiyon Tionghua nga nogi’ notindapou mogigiyon mogisusuai tinaru i haro id pogun diti.
