Hajiji pinopotunui tandamato kuminaa di Tun Juhar.
KOTA KINABALU: Koporintaan Pogun pinopolombus kopongunsikohan kumaa di Tun Juhar Mahiruddin i momupus surupukaraja’ sabaagi Molohingon Agayo (TYT) Pogun Sabah do suab, ko 1tw Koiso’ 2025.
Boyoon Montiri, Datuk Seri Haji Hajiji Haji Noor minoboros, katalib 14 toun, Tun Juhar nopo nga’ i Molohingon Agayo Pogun bobos alaid poinsurupu karaja’ om minanahak kinouhupan di agayo kopio kumaa Sabah.
“Tuan Yang Terutama Tun pinapatahak surupu karaja’ di aiso’ kaadangon, i nokopokito mogisusuai kinaantakan om kinoburuon i kapaampai kopogisusuaian om koyuyuon kaganaan pulitik, ikonomi, koumoligan, kolidasan, balajaran, kougamaan om sopiagal dilo’.
“Koyuon ngaawi’ diti naantakan di maso disio mongigit karaja’ sabaagi Molohingon Pogun Ko-10 om nokopo’iliu disio id nindikohon di osonong sabaagi songulun momuruan di kiharo nawawaya’an om kiginawo agayo,” ka disio id Ramai ‘Santapan Negeri’ montok mongunsikou Tuan Yang Terutama Yang di-Pertua Negeri doid Longkod Konvensyen Sompomogunan Sabah (SICC) do hiti di kosodop.
Minoboros isio, wookon kinaantakan i nokosurat doid susuyan kahandaman Sabah kaampai no kinaantakan pinonugkuan di tulun songkosuayan id Tanduo di 2013 om kinopogkorolihan tomporuruol Covid-19 i minimpuun di koompokon toun 2019 gisom kolimpuunon toun 2022.
“Goduduo kinaantakan dilo’ nokopo’iliu rayat Sabah id koyuon di oinggorit. Ogumu’ tulun di nokoidu’ pogun.
“Alhamdulillah, id siriba’ pomuruanan di Molohingon Agayo Tun, nokoponolibamban tokou kaantaban diti,” ka disio.
“Rayat Sabah amu’ monimud tinaru, koubasanan, ugama’ om kotumbayaan toririmo pinopokito pogilisihan om kopodulianan diolo’ kumaa di Molohingon Agayo Tun om sawo i Yang Amat Berbahagia Toh Puan Norlidah R.M Jasni id koinsanai ababayan ginumuan i pinapanau diolo’,” ka disio.
Hajiji minoboros, kopomuruanan Koporintaan Pogun om rayat Sabah mongunsikou amu’ gigina’ kumaa di Tun Juhar mantad kopomuruanan abantug po’ompus 14 toun minomorinta’ om minomodu’a disio nogi’ i Toh Puan Norlida toririmo osonong id pamanahan diolo’ do potilombus diti.
