KOTA KINABALU: Koporintaan pogun tumopot monilombus kopoburuan om mongimbulai lobi kogumu’ kosiwatan komogoton ikonomi montok rayat Sabah, ka di Boyoon Montiri, Datuk Seri Haji Hajiji Haji Noor.
“Orohian oku mongunsikou kumaa rayat mantad sokodung potilombus om kotumbayaan kumaa koporintaan GRS-PH Plus montok momuruan pogun diti. Kanou tokou no misompuru id pogi’isaan, om poposuul pisompuruan montok no do kaadangon pulitik montok pogun tokou di koupusan,” ka disio id pason Toun Wagu 2025.
“Kanou tokou no mintong kumaa toguang montok monginwagu tonggungan do monilombus kalantaion om sondikoton kopoburuan tokou. Toun 2025 nopo nga’ toun montok dati’ lobi kagaras monilombus ababayan kopotundaan nogi’ papatantu’ kasasanangan rayat,” ka disio.
“Toun 2024 nopo nga’ toun di osonong. Nokowonsoi tokou di bobos osonong montok monoibau mogisusuai kaantaban om poingkakal id waya’an montok mamagampot sondikoton tokou. Nakalantoi tokou minomuhu somok RM7 bilion di toun 2024 om nakaanu tokou soginumu’ RM1.7 bilion id kopoopuan labus om suang pogun do toun diti.
“Kanou tokou no monilombus naangayan diti om moningkanan kumaa tolu tukod oponsol id siriba’ palan Sondikoton Sabah Maju Jaya (SMJ) montok kosunion ikonomi pogun diti – pomutanaman, pomorunan om ponombuluyan,” ka disio.
Id timpu apat toun notoliban, nokosigampot tokou kinomogoton agayo okon nopo ko’ id tolu tukod oponsol diti nga miampai kopoopuan id ‘modal insan’ maya’ kinoingkawason ponguhupan sikulasip om ponguhupan susumikul, minongingkawas kopoobian kumaa RM127 riong do toun 2025 montok koundaran lobi 10,000 susumikul di poinharo om susumikul wagu di kosudong.
“Minonuridong tokou nogi’ do 5,000 tinan walai id siriba’ inggisaman Rumah Mesra Sabah Maju Jaya montok paganakan kinindopuan osiriba’ id koinsanai 73 DUN miampai 3,000 walai wagu waalon do toun 2025 kopohompit kos soginumu’ RM250 riong. Iti nopo nga’ wookon inggisaman montok monoibau komosikinan ‘tegar’ id pototongkop pogun.
“Otumbayaan tokou inggisaman po’ompus koporintaan pogun montok manalasai kobolingkahangan waig om lotirik diti koowit asil soira’ projik miagal wokok hidroelektrik id Ulu Padas, Tenom, o wookon kotimpuun oukaban. Iti nopo nga’ wookon panalasaian timpu anaru po’ompus koporintaan pogun montok mogisusuai intodonon ginoris aanu monginwagu,” ka di Boyoon Montiri.
Hajiji minoboros, koporintaan pogun i pinopikogos Pibatosan Pisokodungan Komersial (CCA) miampai Petronas di 2022 maya’ SMJ Energy nokosigampot kinosunion di kounsub kopio.
Miampai kopoopuan maya’ koponsolon id projik tumau om gas agayo miagal Samarang PSC, Projik LNG9 om SAMUR, iti nakapanahak nindopuan kolobi RM2 bilion mantad kinapadagangan tumau om gas kumaa pogun diti.
Boyoon Montiri lumansan toun wagu kopogowit tonggungan wagu kumaa oinsanan montok mogititimbang om misompuru.
“Koporintaan pogun tumopot do papatantu’ pisompuruan rayat om kaadangon pulitik toririmo kotimporon montok papatantu’ kosunion ikonomi om koburuon po’ompus montok Sabah.”
Boyoon Montiri minamason nogi’ Kounsikohan Toun Wagu kumaa oinsanan.
