Hajiji (kotolu, gibang) miampai di Montiri Koburuon Mongindapu’ om Koperasi, Datuk Ewon Benedick (kotolu, wanan) om tombului kingaangaran di suai minomutul kek.
KOTA BELUD: Koporintaan Pogun popoobi’ RM124.70 riong montok kopoburuan siktor pomorunan om kopongindopuan id pogun diti do toun tiso’, ka di Boyoon Montiri (KM), Datuk Seri Haji Hajiji Haji Noor.
Kohondot dilo’, kalansanan disio tongo’ mongingindapu’ om koperasi id pogun diti, kaampai id Kadamaian maganu tikid kosiwatan i pinosodia’ koporintaan mooi do lobi koponokisolod om kiginoris monokitopong.
“Koporintaan pogun maya’ Palan Sondikoton Sabah Maju Jaya (SMJ) moningkanan nogi’ doid kopoburuan mongindapu’ om koperasi i miampai mitilombus kouhup kumaa koinsawaton sosioikonomi mogigiyon id pogun diti.
“Iti kopiongoi di tonggungan koporintaan pogun i tumopot do tumilombus monokodung om papagaras siktor kopongindopuan maya’ mogisusuai inggisaman om kaparagatan kopoburuan mongingindapu’ om koperasi id pogun diti.
“Otumbayaan oku miampai koinsanai ponguhupan i pinosodia’ koporintaan, lobi po kogumu’ i aanu poburuon do mongingindapu’ toi koperasi id pogun dtii kaampai id Kadamaian, kosuul no id siktor ponombuluyan om pomutanaman,” ka disio ontok pinopoimagon Ababayan ‘Santuni Madani’ Komontirian Koburuon Mongindapu’ om Koperasi (KUSKOP) miampai Mogigiyon Kota Belud kopihondot Ramai Walai Poingukab Krismas Kadamaian 2024 id Lintuhun Kadamaian Square, Taginambur, do hiti di tadau baino’.
Hajiji (koduo, wanan) pinapatahak ‘replika’ kunci Walai Mesra SMJ kuminaa mamaramit mantad Kampung Tambulion Ulu, Kelarin Dalam.
Boyoon Montiri minamarayou nogi’ inggisaman KUSKOP i tumilombus monguhup mongingindapu’ Nimburuon, Mikro, Okoro’ om Gonsuhatan (PMKS) om koperasi id pogun diti.
Minoboros isio, koporintaan pogun nga’ poinsodia’ nogi’ montok mongingkawas po do piromutan piuhupan miampai KUSKOP id kopoindalanan tongo’ ababayan di kiwaya’ akawas kopiongoid I kopokionuan om kogugunaan maso-maso id sunduk kopongindopuan om nogi’ mogigiyon nokoiyonon.
“Mongunsikou oku nogi’ kopio naangayan i pinosurat do KUSKOP i toririmo tumopot doid koponguhupan mongingindapu’ PMKS om koperasi kaampai tinimungan papadaadagang om mongindapu’ okoro’, kumaa kapagarasan ekosistem kopongindopuan om kopoindalanan koperasi.
“Kalansanan ku KUSKOP tumilombus monguhup mongindapu’ PMKS okon nopo ko’ id Kadamaian nga’ pototongkop pogun diti. Kalansanan koinsanai inggisaman di poindalanon do KUSKOP kapanahak koundaran kumaa mongingindapu’ om koperasi id kopoinggirotan kotilombuson pongindopuan,” ka disio.
Poindamot dilo’, kalansanan di Hajiji Palan Koburuon Kadamaian i pinoimpuun di toun 2020 dilo’ kotilombus kosili puralan kumaa koinsanai komontirian, kotinanan om koupisan koporintaan montok mogowit koburuon id Kadamaian, montok no koundaran mogigiyon nokoiyonon.
Kohondot dilo’ ka disio, pisokodungan om pisompuruan id nayatan mogigiyon pogun diti kiguno tilombuson tu’ oponsol kopio ilo’ do popoburu’ di haal ngaawi’ sosioikonomi mogigiyon suai ko’ kaanu monginggirot do koyuyuon psiompuruan miampai poinpuli.
Karait kinapamaramaian Walai Poingukab Krismas Kadamaian dilo’, nangatan nogi’ disio oinsanan rayat pogun diti do tumilombus monginggirot pisompuruan, piuludan om mogipapantang.
“Kiguno tokou mamaramit koyuyuon toinsanan om momurimon linumis pogisusuaian i haro id pogun diti, o kosuul no. Kalansanan kopihondot Krismas diti, koowit kotoronongon om pilisihan kumaa dati’ toinsanan,” ka disio.
