Dr. Joachim (tanga’) luminoyou sinding uhu ‘Love id Action’ miampai puruankuasa’ manganganjur KKCC 2024 om puruankuasa’ KKCC 2025, nogi’ tongo’ tombului naalap i nokotindapou.
KOTA KINABALU: Kota Kinabalu Christmas Celebration (KKCC) 2024 nosili kokitanan piuludan mogigiyon Sabah, kopokito sunduan mogilisi om pisompuruan i nopokitanan po’ompus poindalanan ababayan dilo’.
Kumoduo Boyoon Montiri II, Datuk Seri Dr. Joachim Gunsalam minoboros, KKCC 2024 nokopokito koponsolon mamantang pisuayan om monginggirot pogiromutan sompipi’ mogigiyon.
Kalansanan disio kapamaramaian tikid toun diti kopotimporon kahandaman oomis nogi’ monginggirot po do pogiobpinoian.
Minoboros id sodop pomupusan KKCC 2024, id Padang Merdeka, Kota Kinabau di songkosodop (13tw Kohopod om Duo), Dr. Joachim pinoposotol do kinalataion ababayan diti amu’ doti’ nosigampot nung aiso’ no sokodung mantad mogigiyon.
Dr. Joachim (kotolu, gibang) pinopotunui tutungkap nakalantoi pialaan momonsoi kalung ‘Love id Action’ bobos ogumu’, Sakinah Binti Palau.
Wookon naangayan bobos agayo kinapamaramaian toun diti nopo rikod wagu i nokosurat id Malaysia Book of Record (MBR) montok “Largest Distribution of Hand-Made Beads Necklace”, miampai lobi 10,000 kalung manik pinoikid do aiso’ kabayar kumaa koinsanai di nokotindapou.
“Ilo’ nopo ponokotanda’ pisompuruan om pogilisihan i rinamit tokou toinsanan,” ka disio.
“Ounsikou tokou kumaa koporintaan maso-maso diti tu’ kaanu tokou mananud ugama’ tokou do aiso’ kohimpogongan. Kohondot dio’, sabaagi iso’ tanda’ i koporintaan noondo diti momoguno pogisusuaian ugama’, kopoobian koporintaan kumaa oinsanan tulun okon Islam rinuhangan do potitikid toun ilo’ nopo soginumu’ do toun tiso’ (2025) kopoobian di patahakon nopo RM70 riong nung poiradon di toun baino’ (2024) RM56 riong.
“Ilo’ iso’ kinoingkawason bobos osonong om mongunsikou tokou kopio kumaa di Boyoon Montiri, YAB Datuk Seri Hajiji Haji Noor,” ka di Puru Lintuhun Undangan Pogun (ADUN) Kundasang dilo’.
Ababayan suai i pinamaramai do kararamaian kaampai no pinghuyudan korita’ linumis, konsot koubasanan Krismas, kinoponsupan sinding wagu id album Krismas om KKCC Fun Run. Ababayan minomurisi’ tinan rahat nopo nokopokito tonggungan kumaa kopomogompian sandad posorili’.
Dr. Joachim minanangkabayahan nogi’ kumaa Sabah Council of Churches (SCC) om Dewan Bandaraya Kota Kinabalu (DBKK) mantad sokodung ogirot i nosili posunduran kinalantaion kinapamaramaian toun diti.
Uhu KKCC 2024, “Love id Action” toi “Lisiu Maya’ Koulalaho”, kalansanan kotilombus koposindak sunduan pisompuruan id nayatan mogigiyon Sabah.
Minonongkounsikou nogi’ isio kumaa Puruankuasa Manganganjur KKCC 2024, i binuruan di Penatua Prof. Dr. Jidon Janaun, mantad tinonggungan om inggisaman pinapalantoi ababayan di aramai kopio diti.
Nokotindapou nogi’ Montiri Koburuon Labus Kakadayan, Datuk Jahid Jahim; Kumoduo Speaker Lintuhun Undangan Pogun (DUN), Datuk Richard Yong We Kong; Puru Parimen Tuaran po nogi’ Ponorikohon Sabah Electricity Sdn. Bhd, Datuk Seri Madius Tangau; Monguhup Montiri Kousinan, Datuk Tan Lee Fat; Monguhup Montiri Komulakan om Sipoot, Datuk Fairuz Renddan; Presiden Gereja-Gereja Sabah po nogi’ Ponorikohon Miampai KKCC 2024, Bishop Datuk Melter Jiki Tais; Monunurat Sidang Injil Borneo (SIB) minongobi’ di Presiden SIB Sabah, Reverend Datuk Jerry Ir. Dusing, Luguan Potunud Siktor Kousinan DBKK, Lifred Wong nogi’ tongo’ Monunurat Pointatap om tongo’ upisor koporintaan.
