Dr. Joachim pinopotunui trofi kinalantaion kuminaa Bontugan KBS11S 2024, Kounsol Kakadayan Tawau om sinasi’ dilo’ tongo’ tombului apantang di suai.
PAPAR: Kounsol Kakadayan Tawau (MPT) nosili bontugan Pinialaan Mimbuul 11 Misampaping Trofi Montiri Komontirian Koporintaan Koiyonon om Pomuwalaian Sabah (KBS11S) montok toun 2024.
Kounsol Watas Putatan (MDP) nopo nga’ nakaramit gaa’ Kumoduo, naamot Kotolu piniilangan do Kounsol Watas Papar (MDP) sabaagi mananwalai om Kounsol Kakadayan Sipitang (MDS).
Pialaan i natanud di 14 tiim mantad mogisusuai Bohogian Kikuasa’ Nokoyonon (PBT) doid Sabah diti nokosigampot limunduk dau miampai ramai kinapatahakan gaa’ id Lintuhun Datuk Salleh Sulong, Papar, di kosodop. Ramai kinapatahakan pinoindalan di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Dr. Joachim (tanga’) guminambar miampai oinsanan i nokotindapou id ababayan dilo’.
Id boboroson disio, Dr. Joachim pinopolombus pongunsikohan kumaa oinsanan tiim i monokitanding om puruankuasa’ manganganjur mantad kinaparagaton diolo’.
“Bayahan kumaa Kounsol Kakadayan Tawau mantad kinalantaion nosili bontugan. Orohian oku nogi’ mongunsikou kumaa oinsnaan tutumanud tu’ pinopokito sunduan sipoot om karaja’ tiim di akawas po’ompus pinialaan,” ka disio.
Minamarayou nogi’ isio sokodung oinsanan bohogian i pinapalantoi pinialaan diti, om pinoposotol do kaparagatan miagal diti okon nopo ko’ kopongunsub karalano’ koposion olidas nga nogi’ kopoinggirot piromutan pogialatan PBT id Sabah.
“Kinalantaion pinongonjuran pialaan diti kopokito do pisokodungan ogirot pialatan mogisusuai bohogian kaanu papaharo kaparagatan di osonong om kapanahak waya’ osonong kumaa mogigiyon,” ka disio kawagu.
Suai dilo’, Dr. Joachim lumansan mooi do pialaan diti aanu monilombus miampai ‘dwitahunan’ om kosili impohon popogirot pisompuruan id nayatan puru PBT doid pototongkop Sabah.
Ababayan diti pinupusan di kinapatahakan trofi kumaa tiim ngaawi’ di nakalantoi, nokoposindak po do sunduna sipoot om pogiombolutan i nosili hontolon kopio pinialaan diti.
Nokotindapou nogi’ mobi’ kumaa Puru Parlimen Papar, Datuk Armizan Hj Mohd. Alil, i Datuk Rosli Ibrahim; Puru Lintuhun Undangan Pogun (ADUN) Limbahau, Datuk Juil Nuatim; Upisor Watas Papar, Muhammad Hj Mohd Ali; Lansanon Koburuon Mogigiyon (PPM) DUN Limbahau, Datuk Johnny Mositun om i Upisor Eksekutif MDP i po nogi’ Ponorikohon Manganganjur KBS11S, Jaludin Abd. Karim.
