Dr. Joachim om sawo (tanga’) guminambar miampai wookon mantad mamaramit ponguhupan tusin tunui kumaa 41 tinan gereja.
RANAU: Kumoduo Boyoon Montiri i po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinopolombus sokodung poinponu’ kumaa inggisaman Pulis Diraja Malaysia (PDRM) montok monuridong sulap pulis id Mukim Kaingaran.
Ka disio, inggisaman diti sabaagi laang oponsol id kapantalaban kaparagatan amu’ olidas om papatantu’ kotoronongon ginumuan di po’ompus.
“Sundung rontob kopomusalaan do hiti osiriba’, koponuridongan sulap pulis kiguno kasari’ montok monilombus koyuon di otoronong om oumolig,” ka disio ontok tuminindapou Karnival Pongilagan Kopomusalaan Kepulisian Komuniti pinaanjur PDRM Sabah id Sikul Kabansaan (SK) Kaingaran. Ababayan diti nakapanau solinaid duo tadau, minimpuun di ko 29tw Kohopod om Iso’ katatalib.
Dr. Joachim (koduo, gibang) om i Jauteh (koduo, wanan) minokinongou kopointalangan ontok minooi intong pokikitanan id karnival dilo’.
Dr. Joachim minongunsikou nogi’ kumaa PDRM tu’ minomili’ Mukim Kaingaran sabaagi kinoiyonon pinongonjuran karnival do toun diti.
Minonongkounsikou nogi’ isio kumaa koinsanai kotinanan koporintaan i minampai ababayan dilo’ maya’ pokikitanan di pinaanjur.
“Iti okon ko’ kumoinsanan do ababayan miagal diti do pinaharo. Pogulu diti, karnival miagal pinapanau id Pulou Banggi,” ka disio.
Dr. Joachim (wanan) minamaramit tandamato mantad di Jauteh.
Id kaantakan di suai, Dr. Joachim po nogi’ Montiri Koporintaan Koiyonon om Pomuwalaian minoboros, Koporintaan Gabungan Rakyat Sabah (GRS) nokoposurat ogumu’ naangayan osonong id mogisuaian haal.
“Koporintaan noondo masaan minggisom momupus komosikinan ‘tegar’ id nayatan mogigiyon,” ka disio.
Pinointalang disio, wookon kinalantaion koporintaan GRS kaampai no minongingkawas rizab tunai Koporintaan Pogun kuminaa RM8.6 bilion; pinapatatap kosudongan kumaa papaapu’ mooi do 80 pihatus kosiwatan pakarajaan patahakon kumaa mogigiyon nokoiyonon; om minanahak mogisusuai ponguhupan pinotomod kumaa mogigiyon.
Dr. Joachim minokianu nogi’ mogigiyon Mukim Kaingaran do tumilombus monokodung calon GRS id Pomilian Agayo Pogun (PRN) di obontol montok no kotilombuson koburuon di pinoindalan.
Dr. Joachim (toguang) om Jauteh tuminabi’ om mikorumo dilo tulun ginumuan (susumayau koubasanan) ontok pinapaharo kotombuluyan pokikitanan id karnival dilo’.
Nokotindapou nogi’ id ababayan dilo’ Pesuruhjaya Pulis Sabah, CP Datuk Jauteh Dikun; Luguan Koupisan Kopongilagan Kopomusalaan om Koumoligan Mogigiyon Kontinjen Sabah po nogi’ Ponorikohon Karnival Pongilagan Kopomusalaan Kepulisian Komuniti Mukim Kaingaran, SAC Datuk Azhar Hamin; mongongobi’ Puru Parlimen om ADUN; Monunurat Pulitik di Dr. Joachim, Yubidi Gompoyo; Upisor Watas Ranau, Tinus Manggam; Upisor Eksekutif Kounsol Watas Ranau, Elmer Endra M. Sator; Lansanon Koburuon Mogigiyon (PPM) DUN Kundasang, Dounis Sani; tongo’ luguan koupisan om kotinanan koporintaan pogun om Pisompuruan; nogi’ tongo’ molohingon kampung.
Io’ Dr. Joachim om sawo, Datin Seri Linda Ewit pinapatahak nogi’ toluod tusin tunui RM41,000 kuminaa 41 gereja montok kapamaramaian Krismas wulan Kohopod om Duo diti om kinapatahakan 200 ponguhupan bakul takanon kumaa mogigiyon nolohing.
