Dr. Joachim (tanga’) ruminamit tandamato jersi buul tapapon mantad di Ponorikohon Kelab Anak Muda pogulu nokotimpuun pinialaan buul tapapon.
RANAU: Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinopointalang sokodung ouli’ kumaa inggisaman sukod wagu id kopoonjuran kaparagatan sipoot i kaanu monginggirot sunduan piuludan id nayatan diolo’.
Pinosotol disio koponsolon monilombus kaparagatan miagal diti montok monginggirot piromutan sompipi’ komulakan om kopongukab kosiwatan montok mogiilang tuwa’ pomusarahan.
Dr. Joachim pinopoimagon gimik kinopohimaganan Pinialaan Buul Tapapon nayatan watas Ranau.
Kumoduo Boyoon Montiri dilo’ minoboros pinopoimagon Pinialaan Buul Tapapon nayatan Watas Ranau, i pinaanjur id Gelanggang Buul Tapapon Kampung Lobou Timbua di kaawagu diti.
Minanangkabayahan nogi’ isio kumaa di Ponorikohon Manganganjur, Rienddy Wadin, om oinsanan i mininggisom pinapalantoi ababayan dilo’.
Dr. Joachim pinopoindalan gimik kinopohimaganan Pinialaan Mimbuul 9 Misampaping Poinsompon montok Lintuhun Undangan Pogun (DUN) Kundasang.
Kalansanan po nogi’ disio sukod wagu id watas dilo’ kaanu koundaran mantad kinopoobian i pinahabar di Montiri Kousinan kaawagu diti, mooi do amu’ no yolo’ nuru’ om mundaliu kumaa kakadayan montok mogihum kosiwatan pakarajaan.
di doun sodopon, Dr. Joachim pinopoimagon nogi’ Pinialaan Mimbuul 9 misampaping Poinsompon montok Lintuhun Undangan Pogun (DUN) Kundasang.
Dr. Joachim (tanga’) guminambar pongingitanan miampai oinsanan i nokotindapou id Pinialaan Mimbuul 9 Misampaping Poinsompon montok Lintuhun Undangan Pogun (DUN) Kundasang.
Ponorikohon manganganjur pialaan dilo’, Hapsin Maimin, pinopolombus kopongunsikohan kumaa di Dr. Joachim mantad toluod trofi montok pinialaan dilo’, suai ko’ kumaa oinsanan bohogian i minanahak sokodung.
Dr. Joachim (gibang) pinopoimagon kinopohimogonan jambatan gantung wagu Kg. Lobou Timbua om sinasi’ dilo oinsanan nokotindapou.
Ontok tadau di miagal, Dr. Joachim nga’ pinopoimagon nogi’ iso’ jambatan gantung wagu id Kampung Lobou Timbua.
Nokotindapou nogi’ id ababayan dilo’ sawo disio, Datin Seri Linda Ewit; Monunurat Pulitik, Yubidi Gompoyo; Lansanon Koburuon Mogigiyon (PPM) DUN Kundasang, Dounis Sani, om pipiro lansanon nokoiyonon suai.
Dr. Joachim guminambar pongingitanan miampai koinsanai i nakaampai id ramai kinopohimogonan jambatan gantung wagu dilo’.
