Dr. Joachim (tohuri, tanga’) suminasi ababayan suminain id pialatan Kounsol Watas Kinabatangan i nobian di Upisor Eksekutif, Zuldahri Hj Tujoh (poindikau, gibang) om i Potunud Kopoindalanan Sunmow Cunstruction Sdn. Bhd., Kong Chiong Ung.
KOTA KINABALU: Songinan kakadayan wagu maan turidongo’ id Kota Kinabatangan, Kinabatangan.
Kounsol Watas Kinabatangan om Sunmow Construction Sdn. Bhd. suminain Pibatosan Piuhupan montok Koponuridongan Mogilongot Kakadayan Wagu Seri Milian id ramai i pinaharo doid Wisma Innoprise, do hiti, di konihab (15tw Kohopod om Iso’).
Piuhupan diti kopohompit kinoiyonon kiginayo 157.48 ekar.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam i suminasi’ pinisoinan pibatosan dilo’, lumansan atag koponuridongan dilo’ koowit koundaran kumaa mogigiyon kosuul no id watas Kinabatangan.
Dr. Joachim (tohuri, tanga’) suminasi’ pinialanan dokumen id pialatan Kounsol Watas Kinabatangan i nobian di Upisor Eksekutif, Zuldahri Hj Tujoh (gibang) om i Potunud Kopoindalanan Sunmow Cunstruction Sdn. Bhd., Kong Chiong Ung.
Pikikiro koponuridongan diti kosili iso’ longkod kosunion wagu id watas Kinabatangan i napalan om kopongingkawas gatang hartanah id kinoiyonon pososorili’.
Suai ko ilo’, koburuon diti kosili ponokodung kosunion ikonomi nokoiyonon om haro kogogonopan wagu, koinggumuon kosiwatan pakarajaan om potilombus dino kaanu mongingkawas nindopuan om poposindak rontob ikonomi id kinoiyonon songkoiyonon.
“Pinoilo oku do id inggisaman montok momorikot atag piuhupan diti, pipiro mitingan, pibabarasan winonsoi id nayatan watas om nogi’ Komontirian i kopohompit bohogian Kounsol Watas, Upis Wats, kotinanan ngaawi’ koporintaan suai om mongingigit tonggungan id watas Kinabatangan.
“Manangkabayahan oku mantad inggisaman dokoyu koinsanai gisom nokopomiuwa’ asil. Sundung diti nopo nga’ timpuunon nga’ ilo’ nopo nga’ iso’ i agayo kopio rati om otumbayaan oku oinsanan di nokohompit toririmo moningkanan kumaa koburuon i pikikiro koowit kumaa komogoton om kosunion aparagat watas Kinabatangan,” ka disio.
Dr. Joachim (poindikau, tanga’) guminambar pongingitanan miampai koinsanai i nokotindapou id ababayan dilo’.
Kalansanan nogi’ disio mooi do iti nopo iso’ koimpuunon kumaa toisoiso’ i koporikot koundaran om oguno do koinsanai mogigiyon id watas Kinabatangan.
Nokotindapou nogi’ Monguhup Montiri KKTP I om II, Datuk Isnin Aliasnih om Datuk Mohd. Hamsan Awang Supain; Monunurat Pointatap Komontirian, Datuk Dr. Jamili Nais om Kumoduo Monunurat Pointatap I, Stanley Chong.
