Hajiji (gibang) miampai Ponorikohon PH Sabah, Datuk Christina Liew ontok kinopoimaganan Pitimungan Agayo Toun-toun Gagasan Rakyat, id SICC Kota Kinabalu di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor insan po minanahak kopokitanan do Pomilian Agayo Pogun Ko-17(PRN17) aanu pohoroon do soiraira’ nopo timpu.
Ka do Utusan Malaysia, isio po nogi’ Presiden Parti Gagasan Rakyat Sabah (Gagasan Rakyat) minoboros, PRN17 aanu pohoroon pogulu toi gisom timpu pomorintaan Gabungan Rakyat Sabah (GRS)-Pakatan Harapan (PH) Plus opupusan do wulan Kohopod toun tiso’.
“Pasanganu tokou timpu gisom wulan Kohopod 2025 montok mongunggar Lintuhun Undangan Pogun (DUN) Sabah montok manahak pawaya’an kumaa PRN17.
“Ii atantu’ kotoguang tokou pomilian agayo. Momoguno tokou mandat wagu mantad rayat nogi’ sokodung di atalang montok momuruan koporintaan pogun id timpu limo toun dumonotl,” ka disio ontok pinopoimagon Pitimungan Agayo Toun-toun Gagasan Rakyat, id Longkod Konvensyen Sompomogunan Sabah (SICC), di tadau baino’.
Ka disio, PRN17 nopo nga’ kosiwatan bobos osonong montok diolo’ monginggirot nindikohon om ginaras Gagasan Rakyat om waya’ dilo’ koposili Gagasan Rakyat om GRS ogirot poinsokot id pulitik kagayaan, potilombus dino koponsupu’ blok pulitik di agaras om pantangon.
“Gagasan Rakyat, sabaagi somboogian mantad komponen id GRS kiguno mimpuun mongulud karalano’, mongulud kopoindalanan om koponguludan parti.
“Aiso’ nodii kosiwatan tokou do mongkomiau-miau toi osontob ginawo di nindikohon om naangayan. Aiso’ nodii kosiwatan do mingondos-ondos miampai karaja’ om nindikohon tu’ rayat nopo nga’ intodonon kuasa’,” ka disio.
Minoboros isio, id sunduk doun parti om doun kikoporintaan, kaadangon pulitik dilo’ oponsol kopio montok diolo’ mimang buru’ om mamanau id toguang.
“Nung aiso’ kaadangon om kotoronongon, oinsanan i imanon oolu’ nopo do angkab tomod om binsorou toomod.
“Ingkaa nogi’ kaadangon pulitik tu’ tantu’ do amu’ osigampot nung mogiodu lansanon. Kaadangon pulitik nga’ amu’ otuluk nung rayat nga’ tanggayan do mogiodu om mogisongkiwal sompipi’ tiso’ om tiso’,” ka disio.
