Hajiji (kaapat, gibang) minananud di Tun Juhar i pinopoimagon Tomu Agayo Kota Belud 2024.
KOTA BELUD: Tomu Agayo Kota Belud okon nopo ko’ kopongimbayat korikotan tutumombului nga nogi’ kapabantug kinolumison om kinosusuayon kopogisusuaian kinoubasanan nokoiyonon i haro id pogun diti, ka di Boyoon Montiri, Datuk Seri Haji Hajiji Haji Noor.
Kohondot dilo’ ka disio, koporintaan pogun tumilombus monokodung om popoburu’ kosiwatan tikid watas id Sabah kaampai no popoburu’ sosioikonomi, ponombuluyan om koubasanan mogigiyon dau di olumis.
“Tantu’ no kopongonjuran tomu agayo monikid toun miagal diti kiwaya’ agayo id kopongimbayatan tutumombului suai ko’ popointutun kinolumison kinoubasanan nokoiyonon.
“Tomu agayo diti nga’ kosili kokitanan pisompuruan tu’ tomu nopo nga’ koiyonon pirubaan sosial mogigiyon mogisuai tinaru om ugama’ miagal mogigiyon Bajau, Kadazandusun, Iranun om Sina, I nokotilombus gisom noondo diti.
“Kalansanan ku rayat tumilombus manahak sokodung kumaa tikid ababayan koburuon i poindalanon koporintaan,” ka disio id Tomu Agayo Kota Belud 2024 id Padang Kakadayan Kota Belud, do hiti di tadau baino’.
I Molohingon Agayo Pogun Sabah, Tun Juhar Mahiruddin pinopohimagon ababayan kinopoimaganan Tomu Agayo Kota Belud 2024.11.2
Mogisusuai pinonuang di nulud kopihondot Tomu Agayo Kota Belud toun diti, wookon nopo pokikitanan koubasanan, sipoot rayat, pokikitanan om kapadagangan asil tinunturu’, mogigiyon om nogi’ kinoubasanan.
Daamot dilo’, ka di Hajiji, koporintaan pogun tumilombus montok popoinggumu’ kopoindalanan mogisusuai inggisaman om ababayan ponombuluyan pinotomod, kosuul no id kopoinggayaan piromutan kopointutunan ponombuluyan om popoinggayo piromutan waya’an tawan kumaa pogun diti.
Ka disio, laan diti kituduan mongingkawas kopiromutan Sabah sabaagi rikoton i kopo’uyu nawawaya’an ponombuluyan di bobos koimbayat montok tutumombului saalom toi ko’ sompomogunan.
“Tumanud pinongintoban Kotinanan Ponombuluyan Sabah, ginumu’ kinorikotan tutumombului kuminaa pogun diti mantad wulan Koiso’ gisom Kowalu’ nopo kikikiro 2.1 riong tulun miampai tutumombului sompomogunan soginumu’ 867,231 naamot 1.2 riong nopo tutumombului suang pogun.
“Iti kopokito kosiwatan agayo Sabah sabaagi rikoton ponombuluyan, om otumbayaan oku maya’ pamalanan di kohunung i noulud, ginumu’ korikatan tutumombului kumaa Sabah kotilombus koposurat koingkawason di kounsub.
“Kota Belud nopo nga’ wookon rikoton I kopouyu mogisusuai nawawaya’an ponombuluyan, kaampai pihahambaan, rekreasi, koubasanan, om sandad posorili’ miampai lobi 30 koiyonon ponombuluyan koimbayat montok ongoyon kaampai no id pulou om baang,” ka disio.
Karait do Tomu Kota Belud, ka di Hajiji, ilo’ nopo nga’ iso’ mantad tomu bobos alaid id Sabah I nokosigampot lobi 100 toun linaid.
“Tomu Kota Belud okon nopo ko’ longkod pidagangan, nga nogi’ koiyonon pamansaian om kapadagangan mogisusuai asil nokoiyonon miagal asil pomutanaman, taakanon koubasanan, tinunturu’, dangol, kakamot tuunion, om nogi’ posokoton doun koubasnan. Hiti no tongo’ tutumombului kapaganu babarang tongosonong id gatang di poinpatut,” ka disio.
