Dr. Jeffrey Kitingan
KOTA KINABALU: Kumoduo Boyoon Montiri I, Datuk Seri Dr. Jeffrey Kitingan pinapalabus kopoingatan poinsotol om okodou kumaa koinsanai pesuruhjaya sumpah, majistret om bohogian kikuasa’ poinhompit montok monidsorou poinponu’ ontok monompuan akuan kikanun (SD).
Nopurimanan disio kinoingkawason minonigowo id SD i sinoinan do okon mamasok id Sabah, kosul no montok monokodung upalai dokumen kointutunan.
Ka disio, suang SD diti kopokito do okon mamasok pinopoilo kinoiyonon diolo’ id Sabah om pinohimagon pogoyuon nookunan diolo’, i kotumbayaan kituduan montok papasanang koponompuanan dokumentasi diolo’.
“Koyuon diti koponinong kotongoban di awagat, lolobi no miampai kopohimaganan SD diti di pesuruhjaya sumpah. Sokodung miagal dilo’ koowit kumaa waya’ undang-undang di amu’ kasagaan.
“Timpu om kinosoruon SD diti momoguno pomorisaan di lobi osorisid. Haro waya’ otopot do dokumen ngaawi’ diti aanu pasalaon guno, i koowit kopongumpadanan tinonggungan undang-undang om pomilian agayo id Sabah,” ka disio id kointalangan di tadau baino’.
Dr. Jeffrey po nogi’ Presiden Parti Solidariti Tanah Airku (STARSABAH), pinoposotol tonggungan pesuruhjaya sumpah id kopomogompian tinonggungan sistem undang-undang.
“Mositi’ diolo’ papatantu’ do aiso’ laang di onuon miampai amu’ tumootomod monokodung kopolobusan dokumen kointutunan kumaa okon mamasok maya’ ralan di amu’ oulud.
“Tikid akuan kikanun i kopohompit do upalai kointutunan toi ‘kewarganegaraan’ mositi’ mindalan kopongimuaian di osorisid om upisor mositi’ monidsorou montok mongilang nunu-nunu kopomogunaan sala’ do SD,” ka disio.
Dr. Jeffrey minoboros, bantug do Sabah, tinonggungan sistem pomilian agayo dau om kotopotutan rayat di pohimagon mositi’ posuulon. Iti kiguno umoligan mantad nunu-nunu kapanansalaan toi pomogunaan sala’ kopoindalanan undang-undang.
“Sabaagi rayat Sabah, mositi’ tokou papatantu’ laang di mongongobi’ undang-undang tokou kopokito tonggungan tokou kumaa kinotulidon om kotidukuan kumaa undang-undang di pinatantu’.
“Pokionuon ku oinsanan bohogian kikuasa’ di poinhompit montok miontong koyuyuon diti do poinsorisid, popoimagon kinotopoton tikid akuan om momogompi’ nimpohon undang-undang om demokrasi Sabah,” ka disio.
