Dr. Joachim minamaramit tandamato mantad di Yiew.
KOTA KINABALU: Ginaras montok monongkiboros miampai kiwaya’ lobi koponsol id pomogunan di nokosimban diti, kaampai no id kaganaan pulitik, nung poiradon nodi pogulu diti.
Ponowoli Presiden Parti Bersatu Sabah (PBS), Datuk Seri Dr. Joachim Gunsalam minoboros, piromutan di kohunung okon ko’ papaatod nopo pason id media sosial, nga’ kopohimpit ilo’ do kogoosan momonsoi ponusuyan di koimbayat, mongingkawas kotumbayaan om posuni kogompitan, lolobi no id nayatan siriba’.
Mantad no dilo’, ka disio, luguan kopointalangan kapapanau tonggungan oponsol id kopotontuan karalano’ parti porikot pason om monongkiboros miampai puru nogi’ rayat id kinoiyonon sompoopori.
“Sabaagi luguan kopointalangan, yokoyu id rulud toguang doid koponigompotan sondikoton misi diti.
“Do noondo diti haro mogisusuai karalano’ montok maganu kointalangan. Nga’, intodonon kointalangan diti sasaru’ do amu’ aanu kopongokunan om asaru’ gunoon sala’ di boogian aiso’ tinonggungan montok koundaran diolo’.
“Id pomogunan di nokosimban diti, kaampai no id pulitik, potoguang tokou mogisusuai kaantaban miagal kointalangan oudut, ‘skeptisisme’ ginumuan, mongumang-umang siber, om ogumu’ po suai.
“Tongo’ kaantaban diti momoguno dati’ do sumili opulokis om ‘inovatif’ id koporikotan karaaralano’ pulitik mooi do mogigiyon karati om monokodung poburuon tokou montok kopotutan rayat Sabah nogi’ pogun koupusan diti,” ka disio ontok pinopoimagon Bingkil Komunikasi Strategik PBS id Palace Hotel, do hiti, di konihab.
Dr. Joachim ontok minanahak boboroson.
Dr. Joachim i po nogi’ Kumoduo Boyoon Montiri II, minongunsub koinsanai luguan kopointalangan parti mooi do momusorou miampai ‘kritikal’ kokomoi karalano’ monoibau kaantaban diti om posili dilo’ kosiwatan montok monginggirot parti.
Kalansanan disio maya’ do bingkil diti, tongo’ tutumanud kopongingkawas komilaan piromutan kohunung nogi’ mongunsub piuhupan miampai miilang pomusarahan, kaantaban om kobolingkahangan ngaawi’ id nayatan siriba’.
“Bingkil nopo diti nga’ kosiwatan montok miilang pomusarahan om misokodung. Unsubon ku tikid tutumanud do miilang nawawayaan, pomusarahan, om karalano’ sompoopori. Miampai minsingilo mantad nawawaya’an panel mononomboros om tutumanud suai, koponginggirot tokou kabaalon otitimung om mongingkawas ginoris sabaagi papatahak kointalangan di kiwaya’.
“Montok mamagampot sondikoton diti, piromutan kohunung okon nopo ko’ tonggungan dokoyu, nga nogi’ momoguno tonggungan kumaa di kinotulidon, tinonggungan om mamantang pokikionuon rayat,” ka disio.
Minonongkounsikou mantad inggisaman di Luguan Kopointalangan PBS Bohogian Kota Kinabalu, Yee Tsai Yiew, i po nogi’ ponorikohon manganjur bingkil om kinotonudan tongo’ tutumanud id kinopoindalanan karaja’ oponsol diti, kalansanan di Dr. Joachim asil pinibabarasan id bingkil dilo’ koowit pomusarahan ‘inovatif’ om ponginsomokan osonong i aanu gunoon parti, mooi do PBS kotilombus kosudong om kopiongoi di kinoburuon tiknologi.
“Kanou tokou no momoguno poinponu’ bingkil diti om popogura’ parti tokou kumaa toguang maya’ kuasa’ piromutan kohunung,” ka disio.
Nokotindapou nogi’ Kumoduo Presiden PBS, Datuk Jahid Jahim; Timbang Presiden, Datuk Johnny Mositun; Monunurat Agayo, Datuk Julita Majungki; Luguan Kopointalangan, Datuk Joniston Bangkuai; Kumoduo Luguan Koonduan, Datin Seri Vicky Yee om Luguan Tinimungan Komulakan, Dr. Christoper Mandut.
