Dr. Joachim ontok minanahak boboroson disio id kapahabaran media piotomod doid Kompleks Bersepadu Komontirian Komunikasi, Jalan Lintas di tadau baino’.
KOTA KINABALU: 89 kontinjen kaampai id ababayan istiadat pinghuyudan kopihondot Pamaramaian Kinouliton Toun Kinosusuon Pinotomod Ko-71 di Molohingon Pogun (TYT) Sabah do hiti ontok tadau Koonom diti (5tw Kohopod).
Kumoduo Boyoon Montiri II, Datuk Seri Dr. Joachim Gunsalam i po nogi’ Ponorikohon Puruankuasa’ Induk Pamaramaian Kouliton Toun Ko-71 di Molohingon Pogun (TYT) Sabah minoboros, kotonudan nopo dilo’ nga’ mantad koupisan koporintaan, swasta, tongo’ koisaan, susumikul kotinanan pinsingilaan akawas om nogi’ susumikul sikul.
“Agayo ponongkounsikohan ku om kaandasan di kohompitan oinsanan. Iti kopokito sunduan ‘patriotik’ di haro kumaa lansanon tokou. Molohingon Pogun Sabah,” ka disio id kapahabaran media pinotomod i pinapanau kopihondot pamaramaian dilo’ id Kompleks Bersepadu Komontirian Komunikasi, Jalan Lintas, do hiti, di tadau baino’.
Dr. Joachim po nogi’ Montiri Koporintaan Koiyonon om Pomuwalaian (KKTP) minoboros, posodiaan Pamaramaian Kinouliton Toun Kinosusuon Pinotomod Ko-71 di Molohingon Pogun (TYT) Sabah notimpuunan di kolimpuunon wulan Kolimo 2024 po.
Montok papatantu’ pamanahan ababayan Istiadat Pinghuyudan tadau Koonom diti, minoboros isio, tolu timpu raptai pohoroon miampai koinsanai di poinhompit. Raptai diti kotimpuun ko 1tw Kohopod 2024. Ababayan diti id siriba’ panamangan Puruankuasa’ Popoindalan Dewan Bandaraya Kota Kinabalu.
“Pinoilo oku posodiaan id watas ngaawi’ nga’ winonsoi hinombo do ‘billboard’ pinoudong pointonod podi wulan Kosiam ilo’ nopo nga’ kopihondot Tadau Malaysia. Kounsikohan kumaa oinsanan Bohogian Kikuasa’ Nokoiyonon i pinopoingkakat billboard sabaagi ponokotanda’ pamaramaian Pamaramaian Kinouliton Toun Kinosusuon Pinotomod Ko-71 di Molohingon Pogun (TYT) Sabah id watas sompoopori,” ka disio.
Minoboros isio, soginumu 12 ababayan pinalan poindalanon do Puruankuasa’ Manganganjur.
Dr. Joachim (kaapat, wanan), Jainisah (kaapat, gibang) nogi’ oinsanan tombului i nokorikot id kapahabaran media pinotomod dilo’.
Minonongkounsikou isio kumaa oinsanan i nokohompit mininggisom papatantu’ tikid ababayan napalan miampai osorisid om lumansan do koturunduson pamanahan koinsanai ababayan dilo’.
“Sabaagi Ponorikohon Puruankuasa’ Induk Pamaramaian Kinouliton Toun Kinosusuon Pinotomod Ko-71 di Molohingon Pogun (TYT) Sabah, orohian oku magalap oinsanan mogigiyon poposindak kinamaramiaon Pamaramaian Kinouliton Toun Kinosusuon Pinotomod Ko-71 di Molohingon Pogun (TYT).
“Kanou tokou no rumikot oinsanan om intong ababayan i noulud ontok ababayan dilo. Ababayan kotimpuun osopung jam ko 6.30 kosuabon id Padang Merdeka, Kota Kinabalu,” ka disio.
Dr. Joachim minokianu oinsanan mogigiyon Sabah toririmo momodu’a kolidasan om kounsikohan montok di Molohingon Pogun Sabah, i Berbahagia Toh Puan, nogi’ oinsanan suang paganakan, mooi do toririmo oumoligan om awanadan.
“Yati’ sabaagi mogigiyon Sabah apatut monongkounsikou tu’ kikosiwatan id dolundungan kopomuruanan songulun lansanon i toririmo momoduli’ kotundunan mogigiyon amu’ monompini’ tinaru toi ugama’. Kopomuruanan osonong om kopodulianan pinokitanan di Molohingon Pogun nopo nga’ poombitanan di pantangon om turianan do oinsanan nayatan mogigiyon id Sabah,” ka disio.
Nokotindapou nogi’ Monguhup Montiri, Datuk Mohd Hamsan Awang Supain; Monunurat Pointatap Komontirian, Datuk Jamili Nais; Potunud Koupisan Kopointalangan Sabah (JaPen), Jainisah Mohd Noor; Potunud Koposolimbahan Sabah (RTM Sabah), Salmah Hashim om tongo’ upisor KKTP, RTM om JaPen.
