Dr. Joachim (koduo, gibang) pinapatahak ponguhupan balatak takanon kumaa mogigiyon kampung.
RANAU: Kumoduo Boyoon Montiri po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam tuminindapou Ramai Lansanon Miampai Mogigiyon montok Longkod Watas Mongundi’ (PDM) Kaingaran doid Lintuhun Kampung Meridi, Ulu Sugut, do hiti, konihab (10tw Kosiam).
Id boboroson dau, ka disio, minggisom isio kumakap koinsanai PDM id watas Lintuhun Undangan Pogun (DUN) Kundasang sundung pia atangkangau do karaja’ pinotomod i kiguno poindalanon.
Id timpu miagal, minonuhu’ isio Popoburu’ Mukim, Puruankuasa’ Koburuon om Koumoligan Kampung (JKKK) manahak sokodung kumaa Unit Lansanon Koburuon Mogigiyon (UPPM) id kopoindalanan koinsanai ababayan om mintong kogugunaan tulun kampung.
Pinosotol disio do yolo’ i nonuan tonggungan montok kumaraja’ id toisoiso’ koiyonon papamanau tonggungan id koponguhupan manalasai kobolingkahangan amu’ momuntuk tinonudan pulitik.
“Koporintaan Gabungan Rakyat Sabah – Pakatan Harapan (GRS-PH) Plus i momorinta’ noondo diti tumilombus monguhup mogigiyon amu’ monutun tinonudan pulitik sosongulun dilo,” ka disio.
“I aanu tokou monguhup, uhupan tokou, montok mogigiyon,” ka disio po nogi’ Montiri Koporintaan Koiyonon om Pomuwalaian.
Dr. Joachim (poindikau kotolu, wanan) miampai di Yubidi (poindikau koduo, wanan) om i Dounis (poindikau, wanan) ontok kinorikotan doid Lintuhun Kampung Meridi id Ababayan Lansanon Miampai Mogigiyon, PDM Kaingaran, di konihab.
Karait kopoburuan, ka disio, koiyonon Meridi kiharo no kolinik kolidasan, sikul osiriba’ om lintanga’, nogi’ pangaba’ lotirik om 95 pihatus nakaramit no do pangaba’ waig oburisi’.
“Sundung ingkaa, haro timpu do paip graviti diti do araag. Mantad dilo’, pokionuon ku Lansanon Koburuon Mogiigyon (PPM)/Popoburu’ Mukim toririmo mintong kogugunoon mogigiyon om monguhup,” ka disio.
Dr. Joachim monongkounsikou noig’ kumaa tongo’ lansanon id PDM dilo’ mantad inggisaman di pinoindlaan id kinopoonjuran ababayan dilo’.
Pinapatahak nogi’ isio ponguhupan balatak takanon kumaa tongo’ mogigiyon kampung.
Nokotindapou i Monunurat Pulitik kumaa di Dr. Joachim, i Yubidi Gompoyo; Luguan Watas, Dominic Ganie; PPM DUN Kundasang, Dounis Sani; tongo’ Popoburu’ Mukim, Mobi’ Luguan Tanak Mamasok Pogun (WKAN) om tongo’ molohingon kampung.
