Haji Hajiji Haji Noor
KOTA KINABALU: Pinomohokiman ponokotanda’ tohuri no do Kuut Agayo Belanda minagada’ kopokinsianan i pinafail do monunugat Sulu nopo nga’ habar di osonong kopio montok Sabah om Malaysia, ka di Boyoon Montiri, Datuk Seri Haji Hajiji Haji Noor.
“Kuut Agayo minomonsoi katatapan i minongobi’ kumaa Malaysia potilombus dino nokopomupus ponugatan i amu’ insan okunai Sabah mantad kolimpuunon po,” ka disio.
Hajiji pinoposotol do kobontugan Sabah id Malaysia amu’ nuru’ do olimon om maan bohito’ disaisai nopo.
Boyoon Montiri minanahak komi kumaa kointalangan Montiri id Koupisan Luguan Montiri (Undang-Undang om Reformasi Institusi) Datuk Seri Azalina Othman i minoboros kootusan Kuut Agayo Belanda minonompon pinsingumbalan do boogian i monugat montok popogirotkuasa’ kopokionuan aiso’ kohimaganan kohondot Malaysia.
Koporintaan Malaysia nakaanu kinalantaion oponsol konihab soira’Kuut Agayo Belanda pinapatatap minongobi’ kumaa Malaysia om minagada’ kopokinsianan pinafail do Tinimungan Sulu.
Azalina pinoruput minoboros, kootusan pohimagon Kuut Agayo diti potilombus dino nokopomupus inggisaman koponugatan Sulu i aiso’ kohimaganan kohondot Malaysia id Belanda.
Ka disio, kootusan Kuut Agayo diti nosusuhut kootusan Kuut Pokinsianan Hague di ko27tw Koonom 2023 i minonokodung kasahapan Malaysia kohondot upalai Koponugatan Sulu id Belanda montok mangakun om popogirotkuasa’di nunu i komoyon sabaagi “Gaa’ Tohuri” (Anugerah Akhir) i pinapalabus miampai aiso’ kohimaganan doid Paris di Dr. Gonzalo Stampa di ko 28tw Koduo 2022.
“Kootusan Kuut Pokinsianan Hague, i poinponu’ dilo’ nokopohimagon ningkakaton Malaysia id kes Sulu, winonsoi miampai poinggirot mimpau mogisusuai padaahan poinpoopori kaampai no kinopotingkadan kinoposilihan Stampa sabaagi ‘penimbang tara’do Kuut Sepanyol.
“(Iti kaampai) kinoponuridongan tribunal timbang tara di amu’ apatut, kino’aisoon pibatosan timbang tara di pohimagon, om kinopourutan poindadala’ kopogirotan kuasaan “Anugerah Akhir” i naanu do Malaysia id Perancis nopo nga’ padaahan pomoruhang montok magada’ kinopongokunan om kinopogiratan kuasaán id Belanda,” ka disio id kointalangan di songkosodop.
Id kootusan konihab, Azalina minoboros, katalib pinogintangan poinpuli do panel limo Hakim, Kuut Agayo Belanda pinopointalang do ruputan i pinafail do Koponugatan Sulu amu’ koowit kopotingkodan kootusan di ko 27tw Koonom 2023.
Ilo’ do potilombus magada’ kopokinsianan Koponugatan Sulu do poinponu’ om minonuhu’ tinimungan dilo’ do mambayar kos kopokinsianan sabaagi bohogian di naala’.
Gama-gama’ dilo’, Koponugatan Sulu amu’ kaanu magahou aset Malaysia id Belanda om kootusan konihab kapanahak waya’ agayo kohondot nunu-nunu kopongumbalan popogirotkuasa’ di amu’ nookunan do tinimungan Sulu om mononokodung diolo’ id kaganaan kuasa’ suai.
“Malaysia minamaramit kootusan oponsol diti sabaagi kinalantaionagayo montok kobontugan undang-undang, i mongobi’ laang potilombus kumaa kopomupusan kes Sulu om kopomogompian kinolidangan timbang tara sompomogunan sabaagi koyuon sumpili’ panalasaian pigogutan.
“Orohian oku papatahak pongunsikohan kumaa di Luguan Montiri, Datuk Seri Anwar Ibrahim mantad tonggungan ogirot disio om angkab montok mongumolig kobontugan Malaysia id nunu nopo gatang nogi’ sokodung ouli’ disio kumaa tiim Malaysia i suminahap koponugatan aiso’ poimpahan diti,” ka disio.
Id timpu miagal minonongkounsikou isio kumaa Montiri Labus Pogun, Komontirian Labus Pogun, Koupisan Luyar Pomogunon, Bohogian Haal Undang-Undang, Sekretariat Pinotomod ‘War Room’ Sulu, nuludan Kabinet om mogigiyon Malaysia do oinsanan mantad sokodung poómpus id ninggisaman diti.
Ka disio, koporintaan Malaysia tumilombus papatantu’ kobontugan, koumoligan om koponsolon Malaysia oumoligan tikid timpu.
Pogulu diti, Tinimungan Sulu id inggisaman diolo’ montok popogirotkuasa’ Anugerah Akhir pinorupur soira’minumbal magahou aset komponi Petroleum Malaysia, Petronas id Luxembourg om Belanda, nogi’ momorikot aset diplomatik Malaysia id Perancis (kaampai lansanon akawas).
Di 2019, tinimungan dilo’ pinoruput minaganu laang undang-undang id Kuut Sepanyol montok mokianu pampasan montok tana’ id Sabah, i komoyon do pinapajak di komolohingan diolo’ kumaa songinan komponi pidagangan Boritis di 1878.
