Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minokianu mooi oinsanan boogian kaanu mongimbulai koyuon di oulud id nayatan kaampai no monuduk sukod wagu kumaa ksoonongon.
Ka disio, kaantaban id koponoguangan kinosimbanon timpu di notoguang ummah babaino’ diti agayo kopio.
“Mantad dilo’, koponsolon tonggungan ulama om umara toi lansanon amu’ aanu olimon id kopotontuan kasasanangan nogi’ piuludan mogigiyon, kopusohon kumaa koponsolon oinsanan nayatan mogigiyon amu’ momili’ nantadon oponsol kopio id kopotontuan kaadangon pulitik, koburuon ikonomi om pisompuruan aanu monigampot.
“Nosili tonggungan montok tikid mongingia’ ugama’ id pogun diti mamarati, momuginawo om kisunduan ogirot mnuduk mogigiyon mooi kotilombus kitoilaan kumaa toilaan ugama’ mooi do nubasanan tadau-adau mogigiyon tumanud syariat Islam,” ka disio ontok pinopoimagon Ababayan Jelajah Madani Ulama’ om Umara’ (JMUU) Nayatan Pogun Sabah Toun 2024, do hiti di tadau baino’. Teks boboroson disio binasa’ di Montiri Sains, Tiknologi om Inovasi, Datuk Dr. Mohd. Arifin Mohd. Arif.
Boyoon Montiri minoboros, JMUU kouhup papasarok po do tongo’ kelas pinsingilaan ugama’ kosuul no id masjid om surau doid pogun diti.
Id timpu miagal ka disio, Ababayan JMUU diti mositi’ no do silihon ralan piintutunan om pogisompuruan di koinsanai mongingia’ ugama’ id pogun diti.
“Otopot nopo, karaja’ ngaawi’ dakwah om monuduk mogiigyon okon i ko’ karaja’ di agaan om asanang. Tikid timpu, mongingia’ om pendakwah karamit mogisusuai kaantaban om ‘mehnah’ di mogisowoli po. Mantad dilo’, ababayan miagal diti kalansanan kapanahak pongunsuban sunduan wagu kumaa koinsanai di nokotindapou.
“Montok papatantu’ kapatahakan tongo’ mongingia’ ugama’ id pogun diti koponumboyo’ sinonong, oinsanan mongingia’ ugama’ nga’ mositi’ po nogi’ kaanu ‘tauliah’ monuduk i pinalabus maya’ Kounsol Ugama’ Islam Sabah.
“karalano’ diti oguno montok papantau’ kaparagatan ngaawi’ di pasansala’ aanu manamong nogi’ kapanamong piuludan pogiromutan tinaru id mogigiyon doid pgoun diti mantad koyuon ngaawi’ di angaraat,” ka disio.
