Haji Hajiji Haji Noor
KOTA KINABALU: Koporintaan Pogun pinopoobi’ RM33 riong toun diti montok monginggirot po do kopoburuan ‘modal insan’ lolobi no kurusus om pingludaan kopohompit komilaan sains, tiknologi om inovasi, ka di Boyon Montiri, Datuk Seri Haji Hajiji Haji Noor.
Ka disio soginumu’ RM12.92 riong po pinoobi’ montok kopoindalanan tongo’ kurusus om ponolidikan id institut pomutanaman id pogun diti.
Minoboros isio, koporintaan pogun moningkanan kumaa kopoburuan modal insan mooi do kopongimbulai intodonon ginoris di kitoilaan, kikomilaan, kiginoris monokitopong om kiharo ginirot tinan i nosili posunduran oponsol kumaa komogoton koposion pointongkop.
“Koporintaan pogun toririmo monokodung om manahak ponguhupan kumaa Univositi Malaysia Sabah (UMS) kaampai id sunduk kousinan montok papasaga’ dilo’ popoindalan tongo’ kaparagatan ponolidikan di kiginoris tumopong, suai ko’ kaanu popoburu’ komilaan, mongunsub inovasi om papalabus produk kigatang akawas, gatang montok pidagangon nogi’ mongingkawas piadangan dagangan di lobi kopountung pogun diti,” ka disio id Ramai Pinomupusan om Kinapatahakan Gaa’ Excocipta 2024 kopihondot Ekspo Kecemerlangan Rekacipta (EXCOCIPTA) 2024 UMS doid Kompleks Lintuhun Kuliah Longkod Ko-2 UMS di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Boyoon Montiri minoboros, tongo’ ‘akademia’ ilo’ nopo nga’ mononolidik kiguno papatantu’ koinsanai ponolidikan om inovasi di naanu kosili panantu’ sosonginan univositi dilo’ do kotilombus kosudong toi amu’.
Ponolidikan di poindalanon kiguno maganu kokiraan di tongo’ haal nga’ poinghompit miagal do kosudong, otopot om kaanu manalasai kobolingkahangan mogigiyon om pomogunon, ka disio kawagu.
“Sabaagi kotinanan toilaan i okon nopo ko’ pasanganu tongo’ angabaal toi sarjana om kaanu monuduk tulun kinaangayan akawas i kanau monumboyo’ kopokionuan pidagangan om pomorunan, UMS nga’ mositi’ nogi’ do kaanu monuridong kootusan om pomusarahan kirati montok momuruan opomogunon manalasai mogisusuai kobolingkahangan maso-maso,” ka disio.
Hajiji minobros, inovasi di owonsoi tongo’ mononolidik kalansanan kouhup poposiau koburuon ikonomi om sosial mogigiyon om pogun Sabah.
Ka disio, koporintaan pogun mamaramit kaparagatan ponolidikan om inovasi UMS id kaganaan pomutanaman, akuakultur, bioteknologi om ginaras oinwoguan, tu’ Sabah sondiri’ pasanganu intodonon sandad di ogumu’ id kaganaan dilo’ i kiguno gunoon poinggonop montok popoburu’ intodonon ikonomi di wagu.
Id inggisaman mongingkawas po do ponolidikan id pogun diti, nunsub disio tongo’ mononolidik papaharo ponolidikan i kopogiamung mogisusuai kaganaan, popironit pisokodungan miampai mogigiyon nokoiyonon om bohogian pomorunan.
“Kalansananku mooi do univositi tumilombus poposindak nubasan ponolidikan id nayatan akademia dau om owiton kumaal abus ilo’ nopo nga’ kumaa mogigiyon miagal do kumaa sikul. Laang diti nga’ kopiongoi nogi’ pongunsuban di Luguan Montiri, Datuk Seir Anwar Ibrahim i monuhu’ mooi do tongo’ saintis lumintuhun kumaa 100 tinan sikul kosuul no sikul tisan kakadayan om labus kakadayan tikid wulan monotk papaharo kaparagatan kapabantaan kopohompit sains,” ka disio.
Minoboros isio, inggisaman mongimbulai nubasanan ponolidikan momoguno pongunsuban sunduan i potuu id koyuon kopongokunan om toluod kapaampai kousinan om sopiagal dilo’.
“Koyuyuon diti aanu mongimbulai nung puru dilo’ mongigit ogirot di gatang kosimbanon dau. Univositi nopo nga’ koiyonon montok popoindalan ponolidikan, koiyonon montok monsupu’ inovasi om ‘kreativiti.”
Hajiji minanangkabayahan kumaa UMS i kiumur 30 toun do wulan Kohopod om Iso’ toun diti, pinoposotol do UMS poinsuul kiopio id ginawo mogigiyon Sabah om nakapalabus ogumu’ inovasi maya’ ponolidikan do tongo’ pensyarah ngaawi’ dau.
Ka disio, inovasi dilo’ minaan poinggoyoo’, suai ko’ nakalantoi gaa’ om pongokunan id mogisuai nayatan nogi’ mogowit koundaran kumaa mogigiyon.
Karait do EXCOCIPTA 2024, kalansanan disio kinalantaion di tongo’ nangkalantoi kosili pongunsub montok tumilombus momonsoi ponolidikan om inovasi di osonong, potilombus dino mogowit ponolidikan kumaa nayatan sompomogunan om kapanahak koundaran kumaa mogigiyon.
Hajiji nga’ lumansan UMS kotilombus abantug om toririmo kosili koondoan pogun om pomogunon, kopiongoi di slogan dilo’ “Leading Towards Innovative Societies”.
