Dr. Joachim (tohuri kaapat, wanan) suminasi’ di Michael, Tokoh ‘Pejuang Sepanjang Zaman’ minongigit dangol id koondosan.
TELUPID: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minokianu oinsanan puru parti do tumilombus mamanau poinggulu.
Ka disio, inggisaman poburuon parti montok mogigiyon pogun diti kakal osodu’ om potilombus dino monugat koinsanai puru parti tumilombus mamanau kumaa toguang.
Minomonsoi isio pongunsuban diti ontok pinopoimagon duo Mitingan Agayo Toun-toun (AGM) PBS Bohogian N.49 Labuk om N.47 Telupid i pinapanau do sopisuai di konihab.
Dr. Joachim (kotolu, wanan) ruminamit tandamato mantad di Dr. Jonnybone id ramai Sodop Bersatu, katalib pinapaharo Mitingan Agayo Toun-toun PBS Bohogian N.47 Telupid.
Id AGM PBS Bohogian N.49 Labuk i pinahro id Lintuhun Mogisuaiguno Beluran di doun kosuabon, Dr. Joachim po nogi’ Kumoduo Boyoon Montiri II suminasi’ kinapatahakan Gaa’ Tokoh Pejuang Sepanjang Zaman mantad mobi’ apat tinaru id watas Beluran, ilo’ nopo nga’ Kadazandusun, Tidung, Bajau Samah om Sungai kuminaa di bagas Luguan Bohogian i po nogi’ bagas Puru Lintuhun Koundangan Pogun (ADUN) Labuk, Datuk Seri Michael Asang.
Wookon di nokotindapou ADUN Labuk, Datuk Samad Jambri; Ponorikohon Manganjur AGM PBS Bohogian Labuk, Mirsoh Ampak; Luguan Bohogian PBS Labuk, Zamil Ismail; Luguan Tinimungan Komulakan PBS Longkod, Dr. Christoper Mandut, om nogi’ tongo’ Puru Kounsol Akawas PBS, tongo’ Exco Koonduan om Komulakan.
Di doun sodopon, Dr. Joachim pinopoimagon AGM id LIntuhun Mogisuaiguno Telupid.
Dr. Joachim (tanga’) miampai tongo’ tombului naalap i nokotindapou pinopoindalan kinopomutulan kek id Mitingan Agayo Toun-toun PBS Bohogian N.49 Labuk.
Minoboros isio, PBS momusus do tindikohon DUN Telupid id Pomilian Agayo Pogun (PRN) Ko-17, id siriba’ Gabungan Rakyat Sabah (GRS).
Dr. Joachim minanangkabayahan nogi’ kumaa koinsanai raan i nakalantoi pinapaharo mitingan om potilombus dino id nayatan bohogian.
Nokotindapou id AGM PBS Bohogian Telupid ii, Luguan Bohogian PBS Telupid po nogi ADun Telupid, Datuk Dr. Jonnybone Kurum; Ponorikohon Manganjur po nogi’ Mio’ontong Mogigiyon Unit Lansanon Koburuon Mogigiyon (UPPM) N.47 Telupid, Levi Philip; Timbang Presiden PBS, Datuk Johnny Mositun, Monontuduk Agayo, Datuk Seri Michael Asang; Luguan Tinimungan Komulakan PBS Longkod, Dr. Christoper Mandut; tongo’ Puru Kounsol Akawas PBS om tongo’ Luguan Bohogian, tongo’ Exco Komulakan om Koonduan.
Pinoindalan nogi’ Sodop Bersatu montok pinongolimpupus ababayan.
