Dr. Joachim (kotolu, wanan), John (koduo, wanan) miampai dilo’ suai minokinongou kopointalangan pinatahak di kukumaraja’ pinotomod, PBS Moyog Task Force pogulu minonimpuun kinotombuluyan kadaaton liyud.
PENAMPANG: Ponowoli Presiden Parti Berastu Sabah (PBS), Datuk Seri Dr. Joachim Gunsalam miampai tongo’ lansanon PBS Bohogian N.26 Moyog pinapaharo kinotombuluyan kadaaton liyud montok pinapatahak ponguhupan kumaa mogigiyon pososorili’ Kakadayan Donggongon i noumpadan gama-gama’ liyud.
Tinanud isio di Luguan Bohogian PBS Moyog, John Masabal. Nakaampai nogi’ i Luguan Tinimungan Komulakan, Dr. Christoper Mandut miampai Exco Komulakan om Puru Kounsol Akawas (AMT).
Dr. Joachim (gibang) om i John (koduo, gibang) miniboboros miampai paganakan nohompitan liyud ontok pinapaharo kinotombuluyan kadaaton liyud, di tadau baino’.
Katalib minooi intong kawalaian di noliudan, Dr. Joachim po nogi’ Kumoduo Boyoon Montiri II minoboros, ponguhupan kotulunan do noondo diti pokimamahaan kopio.
Ka disio, ogumu’ walai i nolipantaian waig di ontok kinaantakan liyud ko 30tw Koonom, om nogi’ tana’ walai i noiyon-iyon nga’ naraag om ogumu’ padsakaian i naraag gama-gama’ nosuang waig liyud.
Dr. Joachim pinopolombus kolisihan kumaa oinsanan mogigiyon Penampang i naantakan kadaaton dilo’.
“Kiguno tokou mimbulai manahak ponguhupan kumaa diolo’ i momoguno amu’ momuntuk do isai yolo’,” ka disio.
Dr. Joachim (wanan) minintong dilo’ babarang i patahakon kumaa paganakan nohompitan liyud miampai pakakaraja’ pinotomod, PBS Moyog Task Force.
Minonongkounsikou nogi’ isio kumaa tongo’ mononoluod i opuahang pinoposodia’ babarang kogugunoon, babarang ropuhan om taakanon.
Kakadayan Donggongon nopo wookon koiyonon i nadalaan noumpadanan do kinaantakan liyud dilo’ i nokoporundun iso’ niawa.
