Dr. Joachim (kaapat, gibang) guminambar pongingitanan miampai koinsanai i nokotindapou id kopointalangan PANTAS doid Balai Raya Kg. Pinawantai.
RANAU: Koponukatan Ababayan Tana’ Mamasok Pogun Sabah (PANTAS) maan poindalano’ id Zon Turuntungon kopohompit walu’ tinan kampung.
Kumoduo Boyoon Montiri II po nogi’ ADUN Kundasang, Datuk Seri Dr. Joachim Gunsalam tuminindapou id kopointalangan i pinaharo kohondot kopoindalanan projik dilo’ di konihab (25tw Koonom), id Balai Raya Kg. Pinawantai.
Wookon kampung di kohompit nopo nga’ Kg. Tarawas, Kg. Pahu Pinawantai, Kg. Pinawantai, Kg. Turuntongon, Kg. Monggis, Kg. Togop Laut, Kg. Togop Darat om Kg. Daramakon.
Kopointalangan dilo’ notindapou di 800 mogigiyon mantad walu’ kampung kaampai no tongo’ Molohingon Kampung, puru Puruankuasa’ Koburuon om Koumoligan Kampung (JKKK), mogigiyon kampung om puru karaja’ Unit Lansanon Koburuon Mogigiyon (UPPM) Kundasang.
Nonuan yolo’ kopoilaan di bohogian Upis Monguhup Momuhu Asil Tana’ (PPHT) Jaidi Gulis, om Monguhup Potunud Monunukat Tisan Kotonobon (Koibutan), Quzaimi Hassan.
Dr. Joachim minoboros, asil mantad kopointalangan dilo’, iso’ puruankuasa’ pinotomod PANTAS maan turidongo’ id tikid kampung.
“Tikid kampung nuru’ haro mobi’ miampai di molohingon kampung diti montok papasanang karaja’ kopongupalaian id upis PPHT,” ka disio.
Dr. Joachim minoboros, ababayan PANTAS nopo nga’ karalano’ bobos osonong montok manalasai upalai tana’ di mogigiyon id koiyonon diti (Zon Turuntungon) tu’ ogumu’ upalai tana’ di mogisisimbou gisom koowit kobolingkahangan kumaa Koupisan Tana’ om Monukat (JTU) monompuan upalai diolo’.
“Montok koilaan, kopoindalanan PANTAS nokoindalan no id apat zon id Ranau,” ka di Dr. Joachim.
Monongkounsikou nogi’ isio kumaa PPHT, Monunukat Watas Ranau tu’ pinapaharo ababayan kopointalangan dilo’ montok mogigiyon kampung di kohompit.
Nokotindapo nogi i Monunurat Pulitik I om II Komontirian, io’ Datuk Jonnybone Kurum dii Yubidi Gompoyo; Upisor Lansanon Mogigiyon (PPM), Dounis Sani; Luguan Watas Ranau, OKK Dominic Ganie, tongo’ Luguan Mamasok Pogun (KAN) om Mobi’ Luguan Mamasok Pogun (WKAN).
Kopointalangan dilo’ pinapanau miampai sokodung UPPM Kundasang.
