Haji Hajii Haji Noor
KOTA KINABALU: Koporintaan Pogun pinoposodia’ mogisusuai palan om pinopoindalan inggisaman, kosuul no maya’ palan kopoburuan Sondikoton Sabah Maju Jaya (SMJ) montok poposili Sabah lobi koimbayat montok mangangapu’, ka di Boyoon Montiri (KM) Datuk Seri Haji Hajiji Haji Noor.
Tonggungan Koporintaan Pogun montok monoibau mogisusuai kaantaban kaampai kogogonopan om kobuuburuon montok posikap kosunion ikonomi nokito maya’ kinopoobian agayo RM2.63 bilion montok kaparagatan koburuon kogogonopan om kobuuburuon ginumuan id Bajet Pogun toun diti, ka disio.
Minoboros isio, soginumu’ RM679.85 riong pinoobi’ montok mongulud om monoibau haal agayo pangaba’ waig oborisi’ naamot RM430.84 riong pinatahak kumaa koponginsonongan kogogonopan.
Iso’ kawagu palan karaja’ oponsol ka disio, nopo nga’ minongingkawas kopogiroromutan talun-alun om Koporintaan Pogun tumopot do momongo Projik Ralanagayo Pan Borneo nogi’ minomoruhang piromutan ralan suai id labus projik, i wookon dilo’ id fasa kapanamsanan.
Montok monguhup posimban katalahanan pogun kumaa intodonon ginoris amu’ aanu inwoguan kumaa ginoris aanu monginwagu, ka di Hajiji, Sabah pinopoimpuun Palan Sondikoton om Palan Induk Tenaga Sabah 2040.
“Montok popomogot kopolobusan hidro, Koporintaan Pogun pinopoimpuun projik hidroelektrik Ulu Padas di tulan Kohopod om Duo i koponguhup kikiro 187.,5MW om nogi’ kikosiwatan montok mangaba’ kiikiro 6,000 riong liter waig sangadau (MLD) waig. Kopolobusan loji pongubatan waig di poinharo mantad nga’ ningkawasan,” ka disio id Forum Mangangapu’ Sabah doid Longkod Konvensyen Sompomogunan Sabah (SICC) do hiti, di tadau baino’. Boboroson disio binasa’ di Montiri Kousinan, Datuk Seri Masidi Manjun.
Boyoon Montiri minoboros, Koporintaan Pogun nga’ minonowoli nogi’ do kapanamangan kopoindalanan pangaba’ lotirik mantad Koporintaan Pisompuruan miampai minonuridong Suruhanjaya Tenga Sabah (ECoS) tu’ kuasa’ manamong pangaba’ gas om ginoris nopo nga’ iso’ ponginsomokan kopononsog pogun montok manalasai kobolingkahangan ginoris.
Sasabab no do kogogonopan waya’an waig kapapanau tonggungan oponsol id koburuon pomorunan doid Sabah, ka di Hajiji, Koporintaan Pogun minanahak sumbu otomou kumaa Sabah Ports Sdn. Bhd. montok suminain pibatosan miampai iso’ komponi logistik mogisuai pogun (multinasional) montok tumonggoi mongulud Dodopiton Kontena Suok Sepanggar, miamapi di kopoopuan logistik om kogogonopan romut pangaba’ id Sabah.
Koporintaan Pogun nga’ pinopowonsoi nogi’ mogisusuai inggisaman monginsonong di pinalan, pinoindalan om pinapanau montok papatantu’ asil pogun i kogumuan dilo’ tumalahan kumaa asil tumau mata’ om tumau sawit mata’ i amu’ atantu’, kotilombus koinggirot, ka disio kawagu.
Wookon laang dilo’ nopo pinonuridongan SMJ Energy Sdn. Bhd. (SMJE), songinan komponi pasanganu poinponu’ Boyoon Montiri pinoinginan Sabah di toun nakatalib i nakalantoi pinapatatap gatang ‘Nota Kousinan Islam Timpu Gonsuhatan’ kumoiso’ dau kiginumu’ RM900 riong, i pinalabus mantad ababayan sukuk wakalah SMJE i kiharo gatang nomilan gisom RM10 bilion.
“Koluyunhon tunui diti kapasaga’ Koporintaan Pogun popogisusuai intodonon kapambayaran dilo’, mongingkawas koyuon modal om monokodung karalano’ kosunion pogun. Kohondot dilo’, SMJE tumilombus kaanu aset tumau om gas di kopountung om kinimbulayan,” ka disio.
Hajiji minoboros, Sabah nga’ gumura’ kumaa toguang montok mongukab kosiwatan Ekonomi Obulou i kopohompit kopongukaban ogirot intodonon marin om tisan rahat.
Montok tuduan diti, minoboros isio, Lintuhun Undangan Pogun Sabah pinopolulus Enakmen Pongolonan Ginoris Linasu’ Rahat (OTEC) 2024 wulan di nakatalib montok mongukab ralan kumaa koburuon OTEC sabaagi intodonon wagu ginoris aanu monginwagu om sabaagi iso’ mantad inggisaman id siriba’ ‘Blue Economi’.
Karait tonggungan do SDBank, Boyoon Montiri minoboros, ilo’ do noondo diti masaan maya’ kopoindalanan kosimbanon montok popoindalan koponguludan miampai sondikoton maso-maso pogun.
“Kopoindalanan korporat bank di ningkawasan om koponginsonongan winonsoi montok momit nubasanan bobos osonong miampai lobi kosonong. Agayo ginawo ku montok popoindalan do tongo’ projik i masaan id pamalanan nopo nga’ i kapanahak koundaran kumaa pogun.
“Orohian oku posotol do Koporintaan Pogun masaan momogusa’ kotundaon om kopoopuan di agayo montok monokodung kosunion ikonomi pogun. Mantad no diti o SDBank nonuan mandat montok monilombus projik koburuonon i kirati mantad sunduk ikonomi om sosial nogi’ kitonggungan kumaa sandad posorili’ Sabah,” ka disio.
Minoboros nogi’ isio, forum mangangapu’ i pinaanjur do Sabah Development bank Berhad (SDBank) miampai sokodung kopoindalanan mangangapu’ mantad RHB Invesment Bank, nopo nga’ kotondu’ timpu dau tu’ koposodia’ impohon kumaa mangangapu’ do mongilo mantad Koporintaan Pogun karait kinoburuon oponsol kaawagu om dumontol i koposiau kosunion pogun, om poingkuro Koporintaan Pogun do kapasanang om monokodung koburuon diti.
